( انتي وطن ) .!

للمرقاب وأهله ..
وحشه كبر الدنيا

انا غريب .. وعشت نازل ورحّال
اتــــوه فـي حــــبّاني وحـاســــديني

اتــــلفـّني الغربه وانـا مذبل الحـال
فاقد وطن ! واصيح وينه وويـــني

ابكي وللدمعه على القلب محوال
مــاتنزل الا بـــين قلبـــي وبينـــــي

لو انّ لــي قـــوّه وقدره بالاموال ؟
شــريت شيّ يحسّ .. ويحسّ فيني

ما لـ الفرح جرّه ولـ أحزاني أجوال
ومْن الصّــــبر ســدّدت ديني بـ ديني

حــــالم .. والاحـــلام اتبجّح وتختال
مـن كـــبرها ؟ مايــتّسعها يـــقيني !

عاشق بلانظره .. وغمزه .. وجوّال
والـملهمه .. عيّـــا خــجلها تــجيني

ياخاتمة حزني .. والاحلام تنطال :
لاشــفتك وضـــمّت يــــدينك يـــديني

ان اهـــتداك القلب .. تـوّهتي البال
عـــليك .. مايـقطع حـنيني حـنيني

إقــري مــعاناتي على الوجه تجتال
من غيــر لافضفض ولاتـــسأليني

تلقين صبري ينتخي طيب الآمـــال
ونبضي يواسي سنّي .. ودمع عيني

أنتي وطن .. فيه اهتدى قلب رجّال
وانتي عُمر .. يصلح لـ باقي سنيني

ببيـع لك قلبي وعُمري .. بلا مال
وأنتـي بقلبك والعُمر .. قيّميني .!