نصوص مرقابية راقت لي

لدكتور الإبداع / حمد بن وصل العصيمي


جبل دخان سولف للمدائن عن خبـر ذي قـار
وعن هند ابنة النعمـان عـن فلـت ظفايرهـا

عن ارض عنفوان البيد فيهـا علـم الاشجـار
تموت وقوف في وجه العواصيـف وتبخترهـا

عن الدم العروبي يوم بعـروق الكرامـه فـار
عن نحور الجيـاد العاديـات وعـن حوافرهـا

تحدث عن سرايا خالـد وعـن سيفـه البتـار
عن الغـر المياميـن الكـرام وعـن ماثرهـا

من اول فوج فا الهجره ليا اخر فوج فا الانصار
من امة سيد الامـة مـن اولهـا ليـا اخرهـا

عن ارض القادسيه وانهـزام الفيلـق الجـرار
تحت لمع السيوف اللي سعـد للحـق ذاخرهـا

نعم حنا سلايل صفوة الصفـوة مـن الاطهـار
واحق الناس فاطهـر بقعتيـن وفـي منابرهـا

خلقنا الله سيوف مسلطـة فـي هامـة الكفـار
نذلل في كساسـرة الطغـاة وفـي قياصرهـا

عبدنا الله وذلينا المجـوس اللـي تعبـد النـار
وهذي قسمنا فـي ماضـي الدنيـا وحاضرهـا

ليا غلي الثمن دون الوطن ما نغلـي الاعمـار
تهـون اعمارنـا واللـي نوردهـا نصـدرهـا

ثمنه الجنه اللي مـن تحتهـا تجـري الانهـار
والا يا طيب طـاري بيـدخ الجنـه وكوثرهـا

جبل دخـان بلـغ للشهيـد الجنـدي المغـوار
تحيات الصحابه فـا البقيـع وفـي مقابرهـا!


...