نار الغلا ...

بعد انقطااع
اتواصل مع مرقاب العز ولي الشرف
اتمنى ان ترتقي لكم
,
,
بالله ليه الجفا والصَّد يا مقفي
___________________ وراك عنِّي قطعت الوصل بالمرّه
وراك منتب على خبري ولا عرفي
___________________ طبعك علينا تغيِّر يا كفا شرّه
ما تدري إني على وصل الغلا مشفي
___________________ وإني من الصّد ذقت الهم والحرّه
أجيك كلي وفاء واثرك علي تخفي
___________________ ما يوجع القلب يا فتَّان ويضرّه
واشب نار الغلا يومك لها تطفي
___________________ وقلبي من الشوق نسناس الهوى فرّه
مدري متى لي تروق وموجتك تصفي
___________________ وتعاود الوصل كرّه من ورا كرّه
يا قايد الريم شف حتفي على كتفي
___________________ جيتك ولاني معوّد لأول الجرّه
منك المعاذير يا فتَّان ما تكفي
___________________ ما عاد أصدِّق معاذيرك ولا مرّه
أمَّا تجيني وبردان الغلا تدفي
___________________ والاّ تشطّر وسلك المعرفه جرّه
وش خانت العرف دام صويحبك مجفي
___________________ وعن حالي الوصل يسقيه الجفا مرّه

,
شعيل