إبتعد 100 قدم .. ( سريع الإشتعال ) !!

مقدمه :


[POEM="font="Simplified Arabic,5,blue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]السلام السنّه المبدى على سلم العقيده=ياحرار المرقب اللي مايبى مني شهاده

يانجومه .. ياهجومه .. يادفاعه .. ياعضيده !!=ياسيوفه .. يادروعه .. ياسلاحه .. ياعتاده !!

يادماغه .. يالسانه .. يافؤاده .. ياوريده !!=يابروقه .. يارعوده .. يامزونه .. يابلاده !!

ياهل المعنى وسوقه .. ياغناته .. يارصيده=ياهل الجزلات .. واصحاب المعالي .. والسعاده !!

بالاصاله عن كلاش !! وبالنيابه عن قصيده=بعد شكر اللي خلق جنّه مع إنسه للعباده

الكم الشكر الجزيل العاطر اللي مايزيده=فخر غير إنّه محط قلوبكم وأنتم مراده[/POEM]





بعدها إليكم متواضعتي .. وإليهم !!





[POEM="font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]لاتبلاني عسى عمرك يطول=لاتوصيني ولا أبغى لك وصاه

الوصيّه ماهي من أيّات زول=الوصيّه من هل العرف وذراه

الكلام اللي على مذهب وصول=والكلام اللي بلا مذهب بلاه

قل معي للشر ممنوع الدخول=قل معي للخير حي الله نباه

سم بالرحمن وأسمع ويش أقول=وأحفظه في راسك وسكّر علاه

الشعر وهبه من الله ماتزول=أحد يارثها وأحد مكسب يداه

مايزيد عقول وينقّص عقول=كلٍ وقسمه حسب مالله عطاه

ولا يعد الرجل من ضمن الزحول=لو هو بشعره يشد الإنتباه !!

كان ماتسبق حكاويه الفعول=إعتبر ما فالعباه الا العباه !!

والشعر زبد الشعور وما يجول=من مشاعر فالخفوق وماوراه

تجعل الشاعر على عاتق فلول=الهجوس اللي تبى تبحث خفاه

ويتهيض ويتمثل حسب أصول=القريحه لا وصل حده مداه

النتيجه كل مزروع محصول=يقنع الزرّاع منتوج النواه !!

مير تال الوقت يدعو للذهول=يوم صار الشعر سلعة من بغاه

جوه عرض أجوال جول يجر جول=بينين وسومهم وسط الجباه !!

يصعدون أكتاف والشيمه تزول=ذاتهم زايف وأساميهم كماه

والصعود أحيان معنى للنزول !!=مثل مالدخان يصعد مع رداه !!

فعل واحدهم على قرع الطبول=مايحذف ولا يجيب أيّة حصاه

مايعرف من النياق الاّ الذلول=ولايعرف من الطيور الاّ أشبهاه !!

مالهم قيمه ولا معهم قبول=ميتين قلوب لو فيهم حياه

رغم كثرتهم على دور الفصول=وش يضر السيل لو يركم غثاه

الشعر منهم برا حزب الدعول=الشعر منهم برا قوم الهناه

ماتشرّه لا ولا عندي فضول=أترفّع عن هذاه وعن هذاه

وأن شره صاحي على فعل مهبول=ماهو بصاحي ولا يمّه صحاه

كل مقصودي رساله والرسول=للرساله لين تاصل مبتغاه

جيت أقدم حل من ضمن الحلول=يرضي أطراف القضيّه والقضاه !!

الصداع دواه ( حبّة بينادول )=بس مصدوع البصيره .. وش دواه ؟!؟

والعوْج ماظنّه يصير معدول=العوْج يكسر عماره من خلاه

والمجاهر بالردى دونه تحول=الحقيقه كل مادارت رحاه !!

دونه الإعلام يغلق بالقفول=ليت فالإعلام من يقصر مداه

لين ما يبقى لهم ماطا رجول=في طريق ( الشعر ) من ( شينه ) لـ( راه ) !!

قلتها وأعيدها من غير حول=غير باللي مايخيّب من رجاه

خلّوا الميراد يا كدش الخيول=الأصايل تشرب من العد ماه

مالكين الشعر كلّه عرض طول=قسمنا الجزلات في كل إتجاه !!

للقصيده وصف ماهو للشمول=في ضميري .. والضماير ( هاه هاه ) !!

القريحه مزن والمعنى ثعول=المطر لاهل مزنه من سماه

والقصيده روضةٍ خضراء تهول=من دبقها قفر ما حيٍ وطاه

والبيوت زهورها قبل الذبول=من شذاها فاخت النرجس شذاه

الكلام .. الشعر ( مكفول محفول )=عندنا .. واللي سوانا في عماه !!

خوّته شارينها عشق وميول=يوم خوتكم معه جت من قفاه[/POEM]






وسلامة قلوبكم ..