كـــُــش مــــلك !

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
تنقاد في الواجب هجوسي وتنساق = حي الهجوس اللي تجي في وعدها
ماهي بلحية حبر وأقلام وأوراق = لكنـّها تنهلّ ما أحسب عددها
مواقفٍ شتـى من جلال ودقاق = هذيك أشيد بها وذيك أنتقدها
واليوم ملزوم إني آقف على ساق = وقفة نقا لا قبلها وْلا بعدها
قدام وجه اللي على الطيب سباق = والمرجله قام وخذاها بيدها
زاكي المناسب والمحاسب والأعراق = هذيك يرقاها وهذي صعدها
سلايل اللي صيتهم عم الآفاق = روس الرجال ومن زرعها حصدها
سلايل محيّا بعيدين الأعماق = ذخر القبيله وأروقتها وعمدها
وبن ناصر محمد بلا كذب ونفاق = ما مات وأقوالي صحيحٍ سندها
مادام أبو مانع هنا درع ورواق = رسـّى قواعدها وثبت وتدها
علي علي لا يبست أرياق وأرياق = وقف لها من دون فيها وقدها
راسي ومتسيد وعارف وتفاق = في شدة الأزمان والاّ رغدها
عملاق في كل المجالات عملاق = فيه المراجل كلبوها نجدها
للطايله دايم على طول تواق = ولو المكارم ناس راسه بلدها
عشاق للعليا اذا قيل عشاق = عشاق راحتها وعاشق كبدها
كفه سحابة جود وأن لاح براق = همالها ودّه يسابق رعدها
والطيب واحد في مغارب ومشراق = قدايم أوصافه تشابه جددها
لكـنّ أبو مانع بطيبه كذا فاق = كل الشيوخ أن جت بكامل جهدها
يشفق على شوف المسيّر تشفاق = في بهجة أيام الحياة ونكدها
بين أرحبو ولسانه بنود ميثاق = روح أرحبو طيبه وفعله جسدها
راعي هلا يامرحبا جمع وسياق = ماقال ويش عْدادها من مددها
يصدع بها في ليل وغروب وإشراق = وأن قالها لي ودي آقول عدها
حيث إنها تشرح لي الصدر لا ضاق = وتنسى بها نفسي عذابً ضهدها
وكم واحدٍ غيري ليا سمعها فاق = وأفرد حجاجينٍ زمانه عقدها
يقلط وفي المجلس له البن منساق = مابين نمر القاصيات وفهدها
على سنام وكبد وشقاق وشقاق = ومعزبه ريف الضيوف وسعدها
ومعزبه في الصامله يدبل الطاق = يقطع عروق المعضله في مهدها
وأن ثقلت الحمله ولاعاد تنطاق = برك وشال وكنـّه يقول زدها
وأن صار لبحور الدواهي تصفاق = ملا وجيه أمواجها من زبدها
وإليا تساوت له مفاريد ونياق = أستاقها عن شفها ما نشدها
وأن شافها مابين راعي وحلاّق = قفــّى وخلاها لهم ما طردها
وأن هي مزارق طيب ومْكارم أخلاق = أسقى رشاش مزونها من بردها
له كلمةٍ ماهي تلصمق تلصماق = يقدح بها وإليا أعتمدها أعتمدها
والسلعة اللي جات في كل الأسواق = دراهمه في مثلها ما نقدها
معلاق للبندق وللسيف معلاق = يعني الثقه بالنفس ماقد فقدها
صليب راس ويلوي أعناق وأعناق = وكبدٍ يداويها وكبدٍ لهدها
عريب ساس وعانق القمه عناق = وأصفى مواريد المراجل وردها
رفيع ذوق من رفيعين الأذواق = ضمن الدهاه آصنفه بل هو أدهى
هذي حقيقه تنوخذ قبل تنذاق = ماهي هروج آظنـّها وأعتقدها
آسوقها مابيني وبينها سباق = مشاعري تنهــد ساعة هددها
حاولت أرتب كل بيتٍ بما لاق = وأهل الحسد تاكل وتشرب حسدها
ماغير روس أقلام يا كل ذوّاق = والصدق أبوها مثل ماهو ولدها
وأدري إن أبو مانع لذا المدح ما تاق = وأكبر من القيفان واللي رصدها
لكـنّ باب وطارق ومعه طرّاق = مدّو مطـوّاها وحلّو عقدها
الشيخ أبو مانع بلا لفق لفـّاق = فيه القصيده نومست من قصدها
عمّ ونسيب وشيخ ماهي تلصّاق = وأن كبرت القالات قام وصمدها
جيت ألحقه ما ينلحق بأي ملحاق = هو ذيبها هو نمرها هو أسدها
قلت الهجوس اللي تقاود وتنساق = سقها لأبو مانع ياراسي وقدها !
[/poem]