حليّ يا حلاوه !

السلام عليكم ،


بويتات أرجو لها القبول ....




أعذروني عـن غيـاب ٍ زلّتـه مدموحـه
___________________________ وأسمحوا لي لين أراجع سيرتـي وسجلّـي


غبـت كلـيّ والدوافـع كلّهـا مشروحـه
___________________________ أفتحوا كشف الحضـور وسجلّونـي كلّـي


هكذا طعـم المحبّـه .. حلـوه ومملوحـه
___________________________ وهكذا الفرقا مملّـه .. والوصـال مسلّـي


العلم مرفوع يـا اللـي ترفعـون اللوحـه
___________________________ الشحيـح يصـدّ عنـيّ والكريـم يهـلّـي


دام باقي فـي ضميـري نافـذه مفتوحـه
___________________________ عبرها ينفذ شعـوري ليـن يبـرد غلّـي


قلبي المجروح مـدري كبـدي المجروحـه
___________________________ جرّ عمرك يا النسم بيـن الضلـوع وقلّـي


دمعتي تبحث خفـاي وضحكتـي مذبوحـه
___________________________ هيّنـه والصبـر طبعـي والقناعـه دلّـي


ما بقا للشعر واهس والهجـوس تشوحـه
___________________________ بين منقود الرفيق وبيـن شرهـة خلّـي !


أنقرض نسل القصيد وراح راحـت روحـه
___________________________ وأكثـر الشعّـار ولّـت والزمـان مولّـي


أنتكس حالـه وحـال الساحـه المسيوحـه
___________________________ الحصن تضبـط وتربـط والكديـش تفلّـي


يا معيـن الصايبـه والمخطيـه مسموحـه
___________________________ قام يمشي مع رصيف الشمس..راكب الليّ !


جـاك وقـت الـذرّه المفتـرّه الدرموحـه
___________________________ عقب باد ( المارتين ) وبادت ( العصملّي )


يفزع الطحطـوح وألاّ تفـزع الطحطوحـه
___________________________ الدعـاوي حطّهـا وأشتالـهـا بامجـلّـي


كيف صدّرت الفتاوي يـا بناخـي توحـه
___________________________ ( وأنت لا تعرف تصوم ولا تعرف تصلّـي ؟ )


كلّ ما هـبّ النسيـم أستنزلـت منفوحـه
___________________________ والعليّـا يـا ماشـاء الله حظّهـا متعلّـي


القضيّه بيـن شمطـان اللحـا مطروحـه
___________________________ ينقطـع حبـل النفـاق وعقدتـه تنحلّـي


طاوله وأربع كراسي وأمسيـه وأصبوحـه
___________________________ والله الله .. مير حلّي يـا حـلاوه حلّـي !



وسلمتوا ،،