يا جارحني!

السلام عليكم ..


مشاركه متواضعه لعلها تحوز على الرضى ..


[POEM="font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=0 align=center use=ex num="0,black""]على أغنية ياجارحني تطرب أسماعك=وأنت الجوارح تغنّي لك ياجارحني
أخذتني مع لحنك ودقّة إيقاعك=لين اختفى معك صوت ايقاعي ولحني
تفنّن وغنّ لي سمّعني إبداعك=وش غير زينٍ و صوتٍ فيك ذابحني
إليا سمعته عبر موجات مذياعك=تقول من مقعدي كنه يزحزحني
على كثر ما يريّحني من أوجاعك=يبدّد جروح روحي ما يريّحني!
حتى ليا هب من مشرقك ذعذاعك=نوبٍ يبرّد عليّ و نوب يلفحني
طوبعتني لين صرت أمشي على أطباعك=الله يسامحك وأنا الله يسامحني
قنعت معك وعرفت اقدر على إقناعك=يوم الشقا معك .. مسّاني وصبّحني
وأصبحت ما عاد تقدر تحكم اوضاعك=وعجزت بـسلاح هجرانك تكافحني
ورجعت وارجعت قلبي عقب مرجاعك=لين اخضر العشق غطّى ضلعي المحني
يا صاحبي مدّني من مدّك و صاعك=مانيب محتاج غير الفرصه .. إمنحني
انا على أمرك ورهن إشارة إصباعك=وأزعل لزعْلك .. وما يفرحك يفرحني
إتركني أعيش لحظه وسط مرباعك=حرمانك أثّر على قلبي و شرشحني
الروح دلّتك و الأشواق مقداعك=قدّر بهارك على نارك وفوّحني
لكن دخيل الرموش و نظرة أوساعك=لا جيتك بـجد لا تقعد تمازحني
قدّام لا اغرق فـبحرك عطني ذراعك=أنقذني من الغرق واصفح وصافحني
ليه أنحرم من شرف لقياك ووداعك=ما بين لقياك ووداعك تمرجحني!
لو إن ما لاعني يا صاحبي لاعك=حرام لـتجر من قلبك ياجارحني[/POEM]