(*(( الأسامي ))*)

[POEM="font="Simplified Arabic,5,darkblue,bold,normal" bkcolor="transparent" bkimage="" border="none,4,gray" type=0 line=0 align=center use=ex num="0,black""]إن كان لفظي ما لوى ذراع معناي=ماعاد تسوى ياكلامي كلامي
وان كان فعلي ما ملى عين دنياي=الله يصغّر من يكبّر مقامي
ولاّ الشعر ماغير شيٍّ من اشياي=يهمني..ماهوب جل اهتمامي
يعني على ماقيل سكر على شاي=مايروي اللي فالمواقيف ضامي
لله درك يامحمد علي كلاي=هشّمت حلمٍ يستلذّه منامي
ذبحت وصلي في ميادين فرقاي=واحييت حربي في مساحة سلامي
ورميت يسرايه على كف يمناي=وخليتني قدم الظنون إنهزامي
ماهيب عاداتي ولا هي نواياي=واذا بغيت الصدق مدري علامي
ضاقت مراية واقعي من محياي=واسرف زمان الأقنعه في عظامي
ماعاد اعرف احباب قلبي من عداي=واختلّ ميزاني وكف احترامي
أحيان احس انّي مهدّف ورمّاي= ولا فيه رميه جات من غير رامي
واحيان احس انّي على غير مرماي=واشيل درعي واتلحّق سهامي
ماغرّني حرفي وهيبة مسمّاي=لنّ الأسامي ماهي الا أسامي
ماهمّني ياكود وجهٍ من الماي=اللي تشكّل من وراي وأمامي
وانا احسب اللي كان وياي وياي=لين استفزّ مشوّكي من حزامي
وان كان مالله خالق الكون مولاي=ولاّ البقا في راس كفّ الحرامي
اللي رمى جنبي على حدّ مركاي=واستاق قطعان السهر في ظلامي
من حينها لفظي لوى ذراع معناي=واصبحت اشوفك ياكلامي كلامي[/POEM]