أفكاري بسيطه !

السلام عليكم ،


محاوله .. اسمحوا لها وخلوها على وجهـ ها



[poem=font="Simplified Arabic,4,black,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black"]
على الله وش نحبّ و ش نداني=نعدّ أيامنا والعمر فاني

.

تعبنا نتبع الدنيا وشبنا=نشيل ظنون وأحلام وأماني

.

يدور الليل والصبح يتنفس=تحت حكم المعين المستعاني

.

وأنا قلبي يدق وكل دقه=أركّبـها على منطق لساني

.

أغنّي والغنا وهبه من الله=ماجتني من فلان ومن فلاني

.

ولا أدري موهبه وإلاّ وراثه=لكنّه قسم من ربي وجاني

.

بسيط ودايم افكاري بسيطه=في بدع البيت وتركيب المعاني

.

أروح إبها على شداد المطيه=واعود إبها على سرج الحصاني

.

رصاصي من حزام البندقيّه = رميته وأصبح حزام الاماني !

.

لو أن المدح من كل النواحي = غمرني وأحتويته وأحتواني

.

وسط في مستواي ولي مقاسي = أقدّمها على ما الله عطاني

.

أطقّ الباب وأدخل ماعليّه = لو أن الباب للطاقه حداني

.

اشيل الكحل لعيون القصيده=ولي غايه في تكحيل الغواني

.

ليا كحلّتها في ربع ساعه= نتفت رموشها فـ اربع ثواني !

.

وكم غيري من عقولٍ بصيره = ترز أعلام وتعمّر مباني

.

لقيت الخير في كنز القناعه = وقنعت ولا جذبني كنز ثاني

.

أنا ويـّا العلاقات الحميمه = في حرب ٍ طاحنه سر وعياني

.

أضوّي لي مصيبه للحبيبه = وأقول الله بلاها وابتلاني

.

ألا يا روح روحي لو جروحي= تسولف لك عرفتي وش طواني

.

أغيب ولا نقص قدر المحبّه = ولا هنتي وحبك ما يهاني

.

مزاجي وانطوائي وانتهازي = وقلبي قلب مغرور وأناني

.

هذا وصفي في عينك وانتي اللي = ( خذاني الشوق لعيونك خذاني )

.

وطيفك كل ما يضوي عليّه = يجاذب روحي وينفض كياني

.

يسيّر بي على وده وشفـّه = تبعته من مكان إليا مكاني

.

في عيني يا بعد كل الصبايا = اشوفك باشة الغيد الحساني

.

لكن الله يحللك ويبيحك = مع ودي وشكري وإمتناني

.

سلمتي وإختصار آخر علومي = تركت الحب كان الله هداني[/poem]



وسلمتوا ،،