رثـــــــاء ....ب. فواز الديري يرحمه الله

هذه الابيات رثاء بالمرحوم / فواز الديري

كانت وفاته صدمه بالنسبه لي لكونه من اعز اللى اعرفهم

وتربطني معه علاقه قويه .

الحقيقه يعجز الشعر في مثل هالحالات وتعجز الحروف

والقوافي عماّ يجول بالخاطر .

كان اخر اتصال معه يوم الوقفه وجاء بيني وبينه

موعد على ان اقابله ايام العيد بالدوادمي


بيني وبينه نهــار الوقفـه امواعـد
,,,,,,,,, وحــال القضى بيننــا ماتم تحقيـقـــه


ولكن قدّر الله وماشاء فعل

كان الله يرحمه من اوفا اللى اعرفهم بمواصلته

معي بالاتصال او حتى بالرسايل وكانت اخر رساله منه ليلة

العيد الثاني وكانت تهنئه بالعيد .

ومازالت الرساله بالجوال محتفظ فيها .

القصيده هذي اقل شي اقدمه لهذا الفقيد وانا اعترف

اني عاجز عن التعبير عما يجول بخاطري .

وهذي رد جزء بسيط من وفاء الفقيد ...


ولكن المعذره يابو خالد والله يرحمك برحمته الواسعه



ويسكنك فسيح جناته ويلهم اهلك وذويك الصبر والسلوان




وانــــا لــلــــه وانـــا اليـــه راجــعــــــون
[poet font="Arabic Transparent,4,white,normal,normal" bkcolor="white" bkimage="backgrounds/22.gif" border="double,4,gray" type=2 line=200% align=center use=ex length=0 char="" num="0,black" filter=""]
ياعين هلي دموعك ماني براقد=وشلون والدمع قام ايزيد تدفيقه
خليني اهل دمعي وانهي الوارد=فوحي وزيدي على الاوجان تحريقه
تكسّرت عبرتي بالصدر ياخالد=وبدت يابن حازم الاكدار والضيقه
عقب اتصالك تنبّه فكري الشارد=وتوكّد العلم من مصدر مواثيقه
علم(ن) يذوّب صماصيم الحصى الجامد=مااطيق سمعه ولا احد(ن) مثلي ايطيقه
فراّق شمل الملا له يومه الواعد=من حان يومه يجيله دون تفهيقه
حق(ن) على الناس ..كلن لازم ايشاهد=القبر والحوده وضيقه وتحقيقه
مير الفقيده يجيله جرح ومكابد=وتبطي جروحه لك الله مع عشاشيقه
والاّ الردي في حياته بالردى جالد=وان مات عزوا حريمه مع خماليقه
وحنا فقدنا فقيد(ن) بالذكر خالد=لو غاب عنا نشوفه في طواريقه
حر(ن) على اول هداده دايم(ن) صاعد=مير المنايا تلوّت في مسابيقه
نزه الجناب البشوش الوافي الراكد=والطيب فواز عداّ شامخ طويقه
فقدت لي شي واثري خاطري فاقد=صوته على هاتفي وياّ تعاليقه
بيني وبينه نهار الوقفه امواعد=وحال القضى بيننا ماتم تحقيقه
مرحوم ياللي كسب من والده واجد=من طيب ذاته ومن زاكي معاميقه
ماينقده في دروب المرجله ناقد=مرفوع هامه ولا يخضع بتدنيقه
الاّ ليا صار داخل مسجده ساجد=يخشع قدم خالق(ن) يكفل مخاليقه
عسى السحاب ان تزبّر وارجف الراعد=يهمل على قبره وينبت زماليقه
ويالله انا طالبك يامحيّ الهامد=ياللي رجانا ثوابه مع توافيقه
نوّر له القبر وارسل نوده البارد=ويوم القيامه لعله من معاتيقه
وعساه في جنة الفردوس ياواحد=ويلتم شمله ياربي مع عشاشيقه



وتمت

وعساكم ماترون مكروه

الرياض
[/poet]