سوط القصيد

سوط القصايد


[POEM="font="Simplified Arabic,5,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]يقولون الحمول الجايره ما شالها إلا جمال =جمال البدو تبقى جمال ويظل القعود قعود
ويا راع القصايد عندنا ما كل بيت يقال =ولا كل السوالف تنحكي دام الرجال قعود
ترى بعض القصايد لا تعدت نقص للرجال =وتكتب في صحايف عمره الماضي نقاطٍ سود
نصيحه لا تكررها ترى بعض البيوت عقال =عقال الرجل في قوله ، ولا شك البيوت قيود
حضورك ف المحافل خل ينقل لك حضور ابطال=يشرّف وانت غايب وانت حاضر ف العرب موجود
تناقل قولك العالم وتحفظها درر وامثال =ولا ينقل عن اقوالك هزيل الهرج والمنقود
وجنّب عن سفيهين الدلايل واترك الجهال =وخل الدين مقياسك وهذا غاية المقصود
إلى منّك كتبت الشعر وانساقت بيوت جزال =تحيزم بالرصانه والحصافه واسبك المردود
ترى بعض المعاني في بيوت الشعر شم جبال =تقاذف من قممها الشاهقه مثل السيول حيود
وبعض الشعر مثل الكيف الاشقر عطّـّر الفنجال =يقدّم للضيوف من المعزب قبل دهن العود
وبعض الشعر في دهم المواقف يشبه الزلزال =تزلزل به قصورٍ ما بها غير الحسد معقود
وبعض الشعر ما يشرونه العراف لو بريال=بيوته ما تجمّل راس قايلها ودبل كبود
خسر من قال بيتٍ ما يجمّل ينقده عقال =وجره من لسانه لين حطه في فم العبرود
عيون الشعر تتناقل معانيها قرون طوال=ويبقى من يقول البيت الاسمى ف الملا محمود
حفظنا شعر ابو الطيب وكعب وعنتره واقبال =وابو تمام والاخطل وحاتم سرمدي الجود
حفظنا شعر شوقي وإيليا ماضي وابن هذال =وابن حثلين والسامر مسمى شاعر آل سعود
حفظنا البدر والفيصل حفظنا شاعر الأطلال=وابن حوقان وابن طوير وابن عزيز وابن عبود
وابن هادي مع ابن حميد والشاعر علي ابن بلال=وابن لعبون والقاضي مع الهزاني المعدود
وما قلته مثال وغيرهم تزخر بهم لجيال =رجال الشعر في كل القبايل والفهود فهود
بيوتك ربما تدخلك جنة ربنا المتعال =ولكن ربما تقذفك في نار العصاه وقود
وكل الامر زايل غير ما يقبل من الاعمال =وتذخرها ليومٍ فيه قبلك شاهد ومشهود
ولا به خير من نور العباده والهموم ثقال =تصلي ركعتين وتحتسبها والعباد رقود[/POEM]

18/12/ 1427 هـ - الرياض