الجواهر .. بويتات يامشعان !

الســلام عليكم ورحمة اللـه وبركـاته


مبطي عنكم يا هــل الشعبي ..
وجيت على شان تعلمـون مشعـان بهــذي ..
والمعذره مقدمــاً ..





[POEM="font="Simplified Arabic,5,blue,bold,normal" bkcolor="transparent" bkimage="" border="none,4,gray" type=2 line=0 align=center use=sp num="0,black""]


في مرتع شرقٍ عن الحبل ويسار = غربٍ عن قصور الجبيل ومطاره
70 كيلو .. عدّ عدّاد الامتار=قبل يجي للجيب فيه افتراره
جوٍ خضر عشبه على مد الانظار=من عقب جاه الوسم شابك خضاره
سرحت اله والصبح ما ابلج بالاسفار=مما بجوفي من دواعي مزاره
ما رحت له عاني ولي دونه اعذار=الا لبهجة خاطري واستراره
يطيب لي لو كان وقفه ومسبار=والا على الاقدام اسيّر دماره
ارضه دماثٍ كدها سيل الامطار=لو كان فيها ما خلتها الوعاره
ومن عقب جيته والضحى باقٍ يشار=وانا بوقتٍ ما فرقني خصاره
كديت للمحطاب في هاك الازوار=وجبت الحطب والضوّ زاين اوجاره
وشبيت ناري والولع يشعم النار=اسّعر جثامير الحطب بإنسعاره
حتى مشب النار يحتاج منظار=منظار عرفٍ مدركٍ في مداره
دام البصيره مبصره جنب الابصار=الحمد لله ما اتفلظ كبّاره
وادنى بعدها الجمر من دون الإسعار=من عقب باح النور بأول نهاره
من شان صفراً تاخذ الماء بمعبار=اللي عليها السيف زاهي ٍ شعاره
صفراً يطيب الكيف فيها ليا صار=بن اليمن والهيل رقمه فخاره
رقمه رقم ( 1 ) وسجل له اشعار=يربح وراه اللي ابتغى فالتجاره
واسوي الدله بحسبه ومقدار=من فوحها يجلا العمس والكداره
دله على ما قيل فنجالها يدار=يدّرك بها التفكير عقب الحياره
فنجالها لاحط من دونه اعمار=يحسب حسابه من يهاب الخساره
في مشربه منحار وفي كبته عار=وحده من الثنتين تصبح مشاره
اما يجي عقبه مجازف وجبّار=والا يموت وموتته بافتخاره
عادات ربعي في قديمات الادوار=عن حلّها ما نحيل لو حال قاره
نرسي وترسي كنّها ضلع سنجار=اللي رسى من فوق هاك القراره
واصب فنجالي ولا لي بالاكثار=فنجالها له فالضمير اعتباره
هذا وانا لحالي ولا شفت مرّار=وإليا طرى الطاري على الفكر داره
ومع قفلة الصبه مثار الخفا ثار=معْ قفلة الصبه سمعت الاثاره
صوتٍ بدت به وابتدا وقت الاسفار=يمّ العنا من نبرته وانكساره
دنّه لها بالجوف ضربه ومحفار=ومن سمعها جو في يجضّه عواره
دنّه بأثرها دن ناقوس الاشعار=وسميت باسم الله ولا اسميت غاره
وبدعت قافٍ ما بدعته للاذكار=والا لشهرة شاعره وانشهاره
وش حدني لا ابحر بغبات الاخطار=ذايق من الايام مثل المراره
وصغت القوافي صوغ شاعر وبيطار=وبذلت جهدي فيه فوق اقتداره
لاجل الرفيق اللي عسى امثاله اكثار=عندي غلاه أخذ مكان الصداره
له بالمعزه ما تباح إله الاسرار=وله بالمكانه ما اكتسبها جداره
مشعان اخو ناصر ليا دار ما دار=ابعد من الهقوه بجيد وظفاره
للمدح كسابٍ وللطيب بذّار=امكرم ضيفه وللجار جاره
حر تسلسل من صواريم الاحرار=اصّوك وفي راسه لربعه نماره
في ماقفه ما غاب فالماقف الحار=يوم إن غيره سابق لـ اعتذاره
قرم من قروم وللعرف شوّار=والعرف وهبه ما يقال استعاره
من لابةٍ عرّفو بوافين الاشبار=حطو لهم فالمجد صرح ومناره
الاد روق اللي للاخصام ذعّار= اهل البطش على العدى والجباره
يوم إنها فالكون ندي ومغوار=آكوانهم ما ذيّلت بالمعاره
اخصامهم من مات واللي سلم نار=والعلم عن كثره يسد اختصاره
وسر يا قلم ما عاد فيها تعذّار= عن صاحبي والشعر فيه افتخاره
لا صار سابح في بحوره وبحار =وعنده على جزل المعاني سطاره
للبدع نبراسٍ وللرد تيّار=اعصار "وايو الله ايو الله" اعصاره
ويا أعصار وقتٍ فيه سميتك اعصار= للحر قد قالوا تسد الاشاره
وسجل سلامٍ له على فوح الازهار =زاكي شذاها لصاحبي عن وفاره
وسجل مضامين الرسالة والاخبار=عقب السلام ان كانه يدق زاره
وانا ادري انه للعضيلات جوّار =ما غرّني في قو بأسه خباره
سيفٍ وإله وصفين مجهز وبتار=ما هو قنا يمكّنْ يلحقك باره
سلام يا مشعان واعداد ما سار=واطّاف بالبيت الحرم واستداره
والعلم كلّه كيف عابر ومحتار=اسنين والموعود طال انتظاره
عقدٍ من الاحزان حطّ الى تذكار=خمسٍ عليها خمس شفت النكاره
اردّ به واجمع تشاتيت الافكار=واروح وارجع والطماعه زياره
امد به محتار ماني بمختار=مسندٍ والوقت زاد انحداره
وقتٍ على الميلات جاي إله محدار=محدار هيلاً حدرت للقراره
في محور الايام عبري وعبّار=والوضع يبغى جهد فوق الشطاره
يبغى شوية جهد وشوية اصرار=غصّ البحر يمكن تحصل محاره
بعض الجواهر غالياتٍ بالاسعار=ما تنصخى بالبيع لو هي سواره
في حال والا حال يا طير غيمار=اضيق حتى الثوب اوسّع زراره
وانا ادري اني مير صكات الاقدار=وقّفت على تفسير هاك العباره
ما عاد إلى رجعه ولا عندي اخيار=سقنا بعد ساقوا عليه البشاره
تمت وصلى الله على سيد الابرار=اعداد من طّاف الحرم واستداره[/POEM]





وسـلامة الجميــع