على مـاذا 00؟

بسم الله الرحمن الرحيم

وصلي الله على نبينا محمد وعلى اله


[POEM="font="Simplified Arabic,4,black,normal,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""]بعد ما ضمني نفح القصيد وعطره المنثور=على جال الشعور اللي ملك حسِّي وغناها
تخطت مهْرة الكلمه على سفح الشفا المجبور=على ايعازٍ من الاحساس يامرها وينهاها
رعاه الله من شعرٍ يبادل بالشعور شعور=ورعاها الله مهره كن نور الصبح مبداها
تباهت في خفوقي وقدحَت مشكاتها من نور=وأخذت الوم منها كل عينٍ ما نثرَت ماها
جفاك البال يا طرْق الغرام ونهْجك المعثور=ولو كل المساحه لك من اقصاها الى اقصاها
سئمنا والملل فينا من اسبابك خذا له دور=وكرهنا منك اهازيج ٍ تشخبطها ونقراها
وكل اللوم والشرهه على تفكيرنا المحصور=ما بين اسوارك اللي من جهَلنا رافع بْناها
تحكّمت بمشاعرنا والى صوّتّ فينا نثور=مثارٍ يقلب الدنيا من اولها على اتلاها
على ماذا ؟!.. على عين المهاة اللي وصيفة حور=وعلى نشوة غرام ٍ جابها العاشق وودّاها
ومع فكره من افكار الجهل نبني ونهدم سور=معاويل الهدام اعقولنا يدها ومنشاها
حقيقه وش نتاج الشيّ من عقلية العصفور=على اجسام ٍ تسد الشمس عن من ياقف احْذاها
ومعَ صوت المفاخر بالكلام نصفّ بالطابور=ولو غنت به اللي ما تبعّد في معَشّاها
تعزوا كنها سعْد ابن ابي وقاص والمنصور=تحت ظل الفراغ وطِيب مشربها ومرعاها
وتوصّف بالصخا كنها تعادل حاتم المشهور=وهي لو مَرّها الطرْقي على جوعه تعدّاها
تسابق بالطريق اللي من يْدين البنا مهجور=كتبها هامش الوضع لخسارة من تهجّاها
لك الله وش ترجّا من مظاهير العيون العُور=ورسَنها في يدين اللي تهادا في عميّاها
على الله ضيعة الوقت وعلى الله غفلة الجمهور=وعلى الله أمّةٍ كل الأمم تضحك لبلواها
ــــــــــــــــــــــــــــــــــــــــــــــ [/POEM]