عمود الظهر ..!!

السلام علكم ورحمة الله وبركاته


[POEM="font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
انا يارجال المعرفه ياؤلي الالباب = مع اهل الشعر من عادني بزر إلى ذالحين
ألي ذايقه في الشعر تفتح لي الابواب = اعرف القصيد الزين كله واعرف الشين
وذالحين قد عمري يتراوح وتوي شاب = من السته وعشرين الى السبعه وعشرين
احب الشعر وامارسه والقصيد كتاب = عنواينه تبيّن لي اللي مهوب يبين
لامني انشغلت اصك بيني وبينه باب = واذا شفت نفسي فاضي افك له بابين
لكن الهجوس الليله تحايل المرقاب = تبيه ويبيها والقريحه تبي بعدين
ولا ادري منين ابدا ولا ادري وش الاسباب = لكن ياهجوسي واصلي والعرب ممسين
انا الشاعر اللي لا احتمى الماقف الغصاب= لك الله ما اخيب في الرجى هقوة الهاقين
لواني مريض ومن صدوف الزمن منصاب = وفي القلب جرح وفي عمود الظهر جرحين
اباقف لـ .صكات الزمن ماني بمرتاب = مثل ماوقف لـ .الترك راكان بن حثلين
وابآرد على الجمّه وابجرّي الهيّاب = مادامً لي عمرً مسجّل مع الحيين
لين الله يزينها لنا وتهدا الاعصاب = ويروق المزاج وننبسط والامور تزين
واغني طرب واللاحي الغربي الهباب = ملاحات اناسة خاطرً تكسر الروتين
ياقلبي لاتحزن لو تشوف الدروب صعاب = هذي عادة الايام تقسى ونوب تلين
وانا الله عطاني عقل وادراك واستيعاب = عيوني تقديني واشوف الدروب اثنين
امرّ اليسار الملتوي واقطعه مجناب = واسج القدم وامشي مع الغانمين يمين
والاعراب مايعرف حكاها سوا الاعراب = وانا يعربي واحكاي واضح واعرفه زين
ولا اضحك مع الجاهل ولا اجامل النصاب = ولا ضاع عندي دين .. ولا غدالي دين
مثل مالي اعدا في زماني ولي اصحاب = عسى اعداي والله فدوة اصحابي الغالين
رفيقي من الاجناب والا من الاقراب = مقامه وتقديره على الراس قبل العين
ينومسني الطيب لو انه من الاجناب = ولا اداني العيّه لو انه من الادنين
قصير الشبور الخايب العايب الكذاب = مصرحبها مبطي واصرحبها ذالحين
علي الحرام اني لـ .ابيعـه بسـف تـراب= ولاني مليّن جانبي غير للوافين
واذا طال راس الحيه وطال راس الداب = عسى شرهتي ماتعطب رجيلي الثنتين
وحمدي وشكري لله المغني الوهاب = إلاهي ويرحم عبده المسلم المسكين
[/POEM]