صرخة من مدينة عمورية!!

[POEM="font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]حضنك سريري لا غفيت ولمسة يدينك دثار= وعيونك بلادي فديت حدودها جفن وهدب

وانا فدى وجهك ولا لي في تفديه اختيار= وان خيروني قلت فدوى له وانا صدري رحب

لو لم تكوني بنت ابوك الحر قصاف العمار= لاكفاك قولة هذي ام الحر فكاك النشب

يمه ابسال وانتي تعرفين اسئلة الصغار= ما تخلو من امرين يا استفسار يا قلة أدب

وانا تعلمت الادب منك وتعلمت الوقار= من راس ابوي اللي ذهب دمه وكنه ما ذهب

هل هو صحيح انا نسمى هكذا دون اعتبار!!= للأرض والتاريخ والأديان وجذور النسب؟!!

يعني ابفهم ليش انا اسمي (عَمْر) واسأل باختصار= ليش انتي اسمك (هند )يا بنت الاكابر والحسب؟

وليش اسم جدي حضرة (النعمان) عساف المهار= اللي ليا منه غضب ثارت مدينتنا غضب!!

يا هند أنا في حَيره من ( الحِيرة) ومن يوم قار= ومن ماضي ارض اجدادي اللي سطّر بماء الذهب

كانت مدينتنا صغيرة والنفوس بها كبار= الله يا كبر المدن لا كبرت نفوس العرب

كنا نحب الضيف والدلة على جمر الوجار= تبغى تسابقنا على اكرامه ويسبقها الحطب!!

كنا نحفظ العهد والميثاق ونحفظ الجوار=ونقص يمنى السارق ليا مد يمناه ونهب!

لا حاكم الا الله ولا منهج لنا الا الحوار= والشرع ما ينحاز ضد بلال لاجل ابو لهب!!

والشمس تمنحنا الدفا والارض تعطينا الثمار= والامن يهدينا الرضى والنوم يسلبنا التعب

واليوم دار بنا الفلك تسعين دوره واستدار= صار الذنب فا الاسم راس وسمي الراس الذنب!!

حتى مدينتنا اسمها اللي غير قابل للغيار= تغير وصارت مدينة موت كنية أو لقب!
مره تسمى قرطبة مره تسمى قندهار= مرة تسمى حائط المبكى وصحراء النقب!!
والاسم( عمورية) الموقع ( تحت سقف الحصار)= الأنظمة(لا عدل) والسكان( مجموعة لعب)!!!!!!

اثر المدن فوق الخرايط قابله للاندثار= واثر المدن فا الصدر تبقى وشم لله العجب!!

حدودها ماهي جبال ولا سهول ولا بحار= لو هي كذا ما كان منها شبر واحد مغتصب!!

يحدها من غرب غدر وشام شك وشرق ثار= ومن الجنوب اسماء لو فسرتها ما القى سبب!!

فيها خذلنا المعتصم با الله في وضح النهار= وفيها قطعنا لسان ابو تمام والتهمة( كذب)!!

من قله ان السيف يسمع صرختين ام الخمار؟!!= والسيف ماهوب اصدق إنباء ً من اوراق الكتب!!

ما يولد الجلاد يا أماه من رحم الجدار= ولا من عذوق النخيل ولا عناقيد العنب!!

الخوف نطفة والقلوب ارحام والحمل اختبار= يقلون من يذبح حماره لازم يشيل القرب

والحمل عار من البداية والولادة ألف عار= والعار ما نمسحه لين الدم ياصل للركب

اما حياه بعز والا موت ما فيه انكسار= والا حرام الرجل يلبس ثوب ويربي شنب!![/POEM]