أعترف لك

السلام عليكم ورحمة الله وبركاته




اسف على الانقطاع الخارج عن الاراده




متواضعه اتمنّى ان تنال اعجابكم



[poem=font="Simplified Arabic,4,black,normal,normal" bkcolor="transparent" bkimage="" border="none,5,gray" type=2 line=0 align=center use=ex num="0,black"]
مابقى لخاطر عيونك شي ماسوّيته=ومابقى في خافقي داعي لكثر أشواقه

كثّر الله خير قلبٍ بالخطا حبّيته =وكثّر الله طيب خفّاقي وطيب عناقه

ياغلا لو كل جرح يصيبني ردّيته =مالقيت أسهل من الغدر بوفا العشّاقه

أعترف يامن ظلمني كثر ماحبّيته =كان همّي بالوصال وكنت أبيك عشاقه

وأعترف يامن سرقت القلب وإحتلّيته =ماني أوّل واحد يموت بغلا سرّاقه

وأعترف لك كنت أحبّك فوق ماظنّيته =وأعترف ماكنت ناوي خافقك بإحراقه

وأعترف لك مابقى طاروق ماغنّيته =والمصيبه مامعي غير الشعر وأوراقه

وأعترف لك مابقى بي دمع ماهلّيته =وبصراحه!! للحزن ماعاد فيني طاقه

ياكثر من خان فيني والسبب داريته =مثل بنت تخونّني وتقول لي مشتاقه

وياكثر من كان يخدعني وانا عزّيته =وياكثر ماكان قلبي صادق من أعماقه

وين أبلقى شخص يعطيني مثل ما أعطيته =ووين أبلقى قلب وافي يخلص لعشّاقه

كل ماحبّيت شخص بدنيتي وأغليته =كل ما أزيده غلا يزيدني بفراقه

ليه؟؟!! أنا ناقص تعب؟؟ درب التّعب خلّيته=سمّح الله درب من فارق وانا مشتاقه

سمّح الله دربك ولا زال من جافيته=يعشق وصالك ويعشق عينك البرّاقه

والخيانه درب ماهو صعب لا مرّيته =بس مالي لا جمل فيها ولا لي ناقه

طبع فيني لا كرهت انسان ماضرّيته =عاد كيف اللي سكن قلبي بيوم وشاقه

رح مسامح صدّك وماجيت به ودّيته =غير ذكرى خافقٍ صانك وزدت احراقه

والوعد لامرّني طيفك ولا حيّيته =والوعد لا شفت لي غارق وزدت اغراقه

وايش يعني لو فراقك صعب لا حسّيته=الدّوا شافي وطعمه مر للي ذاقه

علّمتني دنيتي دربٍ بعد ماجيته =بس انا بمشيه دامه لاح لي برّاقه

من يروّح من خلاه يموت ماناديته =ومن يجيني ياهلا لو كنت ما أشتاقه

من بناله في حدودي بيت ابهدم بيته =ومن نوى فيني بكسر السّاق ابكسر ساقه

واستمع خطٍ لجل عين الشقا خطّيته=ان بدعت أو قول جابه شاعر من اعماقه

لا تدوّر من تبي حتّى ولو حبّيته =دوّر اللي هو يبي حبّك وأخذك عشاقه[/poem]














وسلامتكم