ميدان الأحرار !!

خرجت هذه المتواضعه خلال فعاليات خيمة الشعر في مهرجان الصيف ببريدة

وهي مهداه للشاعر والأعلامي محمد الغرابي ( ابو فهد )


[poem=font="Simplified Arabic,5,darkblue,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
أخبار ماعندي سواليف وأخبار=مغير قلب(ن) عذّبتة الطواري
أمسيت في دار(ن) وصبحّت في دار=طرقه وليل ومعضلات ومساري
سريت من جدة على وقت الأسحار=من بعد ماضاقت علي الحواري
من الطريق اللي يجي ظلم ويسار=بين الديار وبين هاك السباري
يالرنج لك عندي معزّه ومقدار=مالك ومال معلّقين البواري
فزتكْ مثل الحر لا فز ثم طار=مثل العديم أليا انصرم للحباري
لا أقبلت مثل اللي نوا ياخذ الثار=عقيد قوم وساطي(ن) بالشباري
يحشّمك بطناج الأسفلت والقار=وشلون عاد الأرصفه والكباري
تمشي على البيداء بلا قيد وهجار=مايشبهك ياكود سفن الصحاري
مشوارك الليلة ماهوب أي مشوار=الوضع عاجل والحضور أضطراري
يم القصيم ويم ميدان الأحرار=اللي مخيمهم يمين الحضاري
يا ابو فهد دونك يصدن الأعذار=كنك من الشورى مصدر قراري
أجيك لو دونك يحولن الأقدار=واسج رجلي بين بايع وشاري
وان قلتلي للنار / ابا أطيح فالنار=عقلي مفخخ والشعور أنتحاري
لأنك عزيز ومن طويلين الأشبار=للطيب في وجهك رسوم ومواري
شاعر وأعلامي مثقف وبيطار=وكلن على ماقيل خابر وداري
وتجمعوا شعار من كل الأقطار=وكلن بماعنده يجود ويماري
أحدن يغنيها على بن وبهار=وأحدن من الفرقا يهل العباري
وأحدن يجر الصوت ويشد الأنظار=دايم على بدع الجزيلات ضاري
وأحدن يسريها على دفة الطار=وجحا يقول المشكلة من حماري
وأحدن يمسح جوخ صلفين الأعمار=لاهوب لاكاتب ولاهوب قاري
وأنا عسفت كروش من قب الأمهار=ووردتها بين الوعر والضواري
جنبي على البيدا كما ضلع سنجار=ماحركة صفق الهواى والذواري
واليوم أبا أرحل عن ميادين الأشعار=عنها يسليني صحيح البخاري[/poem]