فصيلة ( هم ) .. !!

رسالة لـ صديقي المبدع جداً ( فيصل الدوسري ) !


حرار الافكار تسري بالرسن والقياد
تمشي لها ليل ولا ليال تجري جري !

ترعى همومي ،وتجفل من عيون الجراد
وتنحاش عن سوره ، وقولي لها : استسوري !

مالومها دام عاشت في حدود البلاد
اللي تغبن الحقود وتفضح المفتري !

لو نكس اعلامها غيبة نقيض السواد
مالومها لو بقت طول العمر تحتري !

تشب نار الفرح وتروح ناره رماد
لا اجرم غيابه وعود من حضوره بري

شاعر وتطرب من بيوته هجوس الجماد
لو ماتاخر وجوده ، همّش البحتري

وقبل الشعر طيّب وهقوات نفسه بعاد
مايقرب العيب ، لكن ف المراجل جري !

صافي ولو زاودوا ف الطيب بالطيب زاد
رصيد عزمه يبدد طمعة المشتري !

يالمرجله بلغي من عاش وسط البلاد
طول غياب المواطن : فيصل الدوسري !




وهذا رد ( ابو سعد ) !


ياديرة الشعر عن بدع البيوت الجداد
تطبّعي بالصبر مع شاعرك واصبري


انكان مابانت افكاري وغابت سعاد
من حقي آكسّر اقلامي على دفتري

حرار عفاس لامن حان وقت الهداد
يكلّ عزمي معاها من سهر محجري

الشاعر اللي بدع جزل القوافي واجاد
كأنّه يقول لغيوم القصيد ( امطري )

تسعة فناجيل شعر مبهّره بالقناد
تسوقها يد كريم ٍ بالمكارم جري

ماهو نجم شعر لكنّه بدون اضطهاد
كوكب شعر واكبر من الارض والمشتري

ان جاتني شرهته من دون كل العباد
ماقلت ياشرهته تسللي واعبري

قامت يدين الحضور تشوح زول البعاد
وقمت اطعن ظروفي بسيفي وفي خنجري

لنّه ضماد الجروح اللي بليا ضماد
شاعر وزحزيح وسنافي وقرم وصري

ان عودت في نتاج اشعارنا والحصاد
انا فقير القصيد العذب وهو الثري

سبة غيابي ماهوب من الغضب والعناد
لا والله الا طبيعة شغلي العسكري