" قسوة "آخر قصائد الأمير الشاعر : خالد الفيصل ( دايم السيف )

" قسوة "

ليه أذا حبيتك اكثر..زدت قسوه

وأن دريت بحاجتي لك...زدت جفوه

وأن عطيتك من حياتي ماتريده..ماكفاك

تحسب أن الحب...نزوه

والله أني ياأحب الناس..أحبك

والله أن الروح لو ترضيك..فدوه

والله أني تارك(ن) غيرك..وجيتك

مزعل الزعلان والعذال..عنوه

كل دقة قلب فيني لك قصيـده

تكفي الدنيا مع الأحباب غنوه

وكل هاجس مايجيب إلا خيالك

سلوتي بالعمر في صحوة وغفوة

أجمع إحساسي وأشواقي وأجيــلك

والبس ثياب الهوي والعشق كســوه

انتقيلك من سواليفي حسنها

والقصايد من غزلها...كل حلـــوه

وانثر العبرات والضحكات عندك

تاخذ اللي تلتقيلك فيه سلوى

وأذكر الله كل ماشاهدت حسنـك

أشهــد إنك فوق عرش الزين ذروه

ماقصدت بكل هذا أتجمل..

أو اقول اني احق الناس حظــوه

أدري اني عادي ومافي ميزه

وادري اني كادحن..ماحاش ثروه

وأدري اني في خريف العمر ماضي

مابقي بيني وبين القبــر خطــــــوه

لكن إني صادقن فيما أقوله

واطلب من الله عن الزلات عفـــوه