لبّ الشـــّـعور

السلام عليكم ورحمة الله وبركاته

بدون مقدمات ,, مشاركه علها تروق لكم ,,,,, ودمتم


[poem=font="Simplified Arabic,4,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]

ما اصعب من الجرح لامنّه تعذّر دواه = الا انّك تعايشه حباً لمن سبّبه
لاصار ويلك عليه ومنه لين وحصاه = والقلب واحد وتكره منْه وتحبّ به
واعطيته اياه من ثاني ثواني لقاه = ماعاد يمديك تطمع به ولاتطلبه
ماتقدر تردّ سكينه على كبرياه = حتى لو انّه قطع قلبك ولاطبّبه
اقصدك يامحاصر انفاسي بقوسين الآه = واهرب من الموت صوب الموت واستقربه
في غيبتك لي سموم وفي رموشك رُماه = والسمّ من يشربه والسهم من يرغبه
تعبْك واللي وهبنيّاه من مبتداه = مالي عليه اعتراض ولا شكيت تْعبه
لكنّ ودّي نشدّ من الضّجر للأناه = العمر ماغير واحد لونبي نحسبه
اما يحصّل به الانسان غاية مناه = والا يعدّه متاعٍ منفري مزهبه
ارجوك عطفاً على حبٍ مغيّب مداه = شيٍ بنفسك تبي قلبي يجيبه جبه
لاتكترث محتسي للفقر عقب الغناه = رصيد ذكرى يشيخ الوقت مايسحبه
قسيت ولا بكى غير القلم بالدواه = دمعٍ عجزت امنع الاشعار لاتسكبه
لك من بحور القصيد الدّره المنتقاه = يثبت غلاها لو الاسعار متذبذبه
ما جيت ابشكيك لك ولا الفت الانتباه = لكنْ قصيدي طبيعي ماخذك مذهبه
رضاك يجعله يتلذّذ بطعم الحياه = واقفايتك تكتمه ,, ماتكتمه ,, تنكبه
هذا هو القصد من بوحه وذا منتهاه = خذ منه لبّ الشعور وعطني التجربه[/poem]