بدو وحضر !!

السلام عليكم ورحمة الله وبركاته

احب ان اطلعكم على بعض معلوماتي البسيطه عن بعض فوارق البدو والحضر من حيث الكلمات واستخدام بعض الالفاظ بحكم ارتباطي بالفئتين ارتباط تاااااام لاحظت بعض الفوارق البسيطه على سبيل المثال :

كلمه لفظها واحد ولكن معناها مختلف مثل : البدوي لما يقول لك فلان صاح .. يعني من رفع الصوت او الصراخ / اما الحضري اذا قال لك فلان صاح .. يعني بكا .

او معنى واحد ويكون اختلاف اللفظ في حرف مثل : الحضري يقول دنّع ... والبدوي يقول دنّق ... وكلاها نفس المعنى أي : طأطأ برأسه

واحيانا يكون المعنى واحد لكن الوصف يختلف .. مثلا .. الحضري يقول قعدت من النوم .. اما البدوي يقول قمت من النوم .. وكلها صحا من النوم لكن مع اختلاف الوضعيه

واحيانا يكون الاختلاف جذري في مسمّا متعارف عليه لغويا ً ..مهوب مثل صاح لا هذا غير .. الحضري اذا قال لبدوي سكّر حلجك !! ... توّهق البدوي القح !! لان الحلق عنده العنق اما الحضري فيطلق على الفم حلق او حلج ان صح التغيير وهي على كل حال اتوقع ان البدوي بيفهم ان سكر حلجك مع الاشاره بعلامة الاصبع السبابه المرفوعه المطبقه على الفم ان معناها .. ألبخ !!

احيانا يكون فيه كلمات دارجه بشكل مختلف عند البدو والحضر وتسبب مشاكل .. مثل الحضري يقول الريال ذيه او هذيه والبدوي ذي او هذي ما يستخدمها الا للانثى .. يعنى يمكن يتماسكون بالحلوق !!

والبدوي اذا ما يعرف اسم شاب في نطاقه الاقليمي متعوّد يتحفــّــــا اللي يعرف واللي ما يعرف ممكن انه يتصايد وجهه لين يشوفه واذا شافه قال كيف حالك هنا الوضع سليم مافيه مشاكل ..

لكن .. احيانا بعض الشيبان الله يطوّل عمارهم ما ينتظره لين يشوفه فـ عادة ً ما يقول : كيف الحال يا صبي ؟؟ .. صبي عند البدوي شاب .. ولكنها عند الحضري خادم يعني بديهي ان الحضري بيقول انه يسبّه !!

وقس على ذلك الكثير من الاختلافات ..

وان كان فيه الكثير من التشابه في كثير من الامور ..

لكن ممكن ان الناس يسهلون اللهجه وتتداخل كلماتهم بشكل كبير يعني

لو يقول واحد مثلا .. عطني القلم وهو بعيد يقول الحضري للبدوي غلــّـــه ؟؟ وذاك يقوله انطله !! ليش كلهم ما يقولون ارم القلم ؟؟ او احذف او قط او اي شي سهل ليش التعقيد ؟

يعني واحد من الشباب صديقه حضري اتصل على تليفون البيت مبطي قبل الجوالات يسأل عنه قال فلان موجود ؟؟ قالت امه مالك لوا .. قال شنو يعني هنيه والا مب هنيه ؟؟

الله الله والله ودي اسرد بعد بعض الحالات لكن هذا اللي طرى علي ..




سلام عليكم ,,