دورات الايــــام

السلام عليكم ورحمة الله وبركاته

بويتات تقليدية متواضعة وضعتها هنا للتواصل لعلها تشفع لي الغياب




[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ما بين صبح ٍ وليل وبين عدل ٍ وميل = دورات الايام تمضي بالاوادم عجال
والوقت لو ياخذ من العمر مدّه جزيل = ياخذ ويعطي بامر رب ٍ عزيز الجلال
ياخذ سنين الشباب اللي هواها عليل = ويعطيك حكمة ليا قل الكلا والظلال
وانا طويت الفراش ولا نسيت الصميل = وسقت الركايب مع المظما وجرد العبال
ومزن ٍ عقبني تركته لو سيوله تسيل = ما هوب لي لو شعت قلبي مزون الخيال
وذات العيون النواعس والقوام النحيل = صدّرت عنها معيف ٍ لو تنادي تعال
واخترت طاعة جليل الملك عنها بديل = وخوة هل الدين والطالة كرام السبال
وكوّنت لي راي فالدنيا ونهج ودليل = مما سمعته وشفته فالسنين الطوال
لو كان ماني على طبع الاوادم وكيل = ولو كانت عيوبي اكثر من رمال السهال
لكنّ حسب اطلاعي صغت قاف ٍ جزيل = وجهة نظر يوم جالي بالقوافي مجال
كل ٍ يبا الطيب مير الطيب دربه طويل = درب ٍ على هاوي الراحة عسير المنال
يحتاج من يسلكه صبر ٍ وسطوة وحيل = حيل الضواري وسطوتها وصبر الجمال
والناس تشبه بعضها في كثير وقليل = الا على سلّم الطالات كل ٍ لحال
حلحيل فالنطق حرف ٍ يفرقه عن حليل = وبالفعل يفرق كما بين الثرى والهلال
ولا فيه شي ٍ على درب العلا مستحيل = والرجل في لازمه لازم يهد الجبال
والدين والجود والنخوة وفعل الجميل = وغض النظر والشموخ خصال واف الخصال
والمال خل ٍ ليا بار الخوي والخليل = لا ركّب الوقت يغني عن ذليل السؤال
راعيه راع الجميل ان صار ما هو بخيل = يغنيه دنيا ودين وكرمة وستر حال
والصمت حكمة وكثر الهرج مابه حصيل = الا شهادة ونصح وردع راعي عيال
كلام ماله ذبيل وصمت عن من يعيل = يحط من قيمة الرجال عند الرجال
ومن يقبل الهون مرة عاش عمره ذليل = ومن لا فعل ما يفيده طيب عم وخوال
غلطان من قال عمر الراس ما صار ذيل = ليا ارتخى الراس عوّد ذيل ما به جدال
[/poem]