ممـنوع الدخـول !

مجرّد محاوله ردّ على خالد الذيابي .. وعساها حول الهقوه


[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ذا اليـوم بعد العصر طرقه وإنفلات = مثل أيّ جمعه شي ماعنــّه عدول
مسكت خط بقيق ياالله في النجاة = والخاطر مْن أمن الطرق صار مْعلول
من كثر ما سجّل عليّ مخالفات = بغيت أكسـّر موتري وأركب ذلول
لكن مشيت وحرّكي ياْ محركات = وأنا بأهوجس والحسا نقطة وصول
مرات أفكر كيف أرد الفايتات = ومرات أفكر كيف أدبر لي نقول
ومرات أفكر مثل تفكير الطغاة = وأرجع لتفكير الرجاجيل العدول
أبلش بعض الأحيان بأشياً تافهات = ولانـي أبلش في ثقيلات الحمول
آفطـّر الوجه البجيح مخمّسات = وأحتار ويش آفطّـر الوجه الخجول
مبطي وأنا ماسح شريط الذكريات = كنـّي كذيـّا لا إتجاه ولا ميول
أبغى آتذكّر شي غير السيئات = والحمد لله في النهايه جبت قول!
ذكرت ذيك الشرّد المتفرّدات = أبيات خالد بن حميد اللي تهول
قريتها ذا اليوم وأدركت الوصاة = ويا مرحباً مليار والعقد مْحلول
يا هاجسي لا بالله الاّ هات هات = ماعاد في الموضوع وش عنقا وغول
ترى السوالف طالعات ونازلات = هذي تزول وذيك لايمكن تزول
بعض القصايد عندي أمّ المكرمات = وبعض القصايد مالها عندي قبول
مثل الأيادي ذي تطول الطايلات = وهذيك تقصر لا تنول ولا تطول
أما أنت يا خالد زبون الكايدات= فحل فحل لاعدّو الناس الفحول
ما تاخذ الاّ العاليه في النايدات = ولا تصيد إلاّ الرشا والا الجفول
وأنا آتشرف يوم فيه مساجلات = بيني وبينك عن تفاصيل وشمول
واليوم تنشد عن حياة وعن ممات = وأنت تـْعرف وش في جبال وفي سهول
أتـلى الليالي كلبـوها مدحدرات = ماعاد ندري من رضيً ومن زعول
ناسً تسوي كل يوم مظاهرات = وناسً تدق إصبع على دق الطبول
والصافنات الصايلات الجايلات = تصفن ولكن لا تجول ولا تصول
عان الرحايل يالذيابي راحلات = واللي يبي يرحل يدور له رحول
لا طايرات الاّ وهنــّه هابطات = والزول يمكنــّه عن الناس معزول
لا آقول باقي حي ولا آقول مات = يعني هنا بالضبط ممنوع الدخول
المال والقـوّه وحب المترفات = شيً يخلي الروس في حكم الذيول
والعولمه منها الضماير في سبات = وأم الغوايش تستفز ام الحجول
نقرى على اللوحه : فقط للسيدات = والعالم الله وش ورى ذيك الدحول
يمكن سوالف ناقيه ومرطبات = وإلاّ سوالف تحت تأثير الكحول !
أدخل على الله من كثير ومن فتات = وآقول يا خالد ولا أدري ويش أقول
الوضع كله لي عليه ملاحظات = وأنا من الله ماني آحب الفضول
أما خذينا الأوله من الأولات = ما كل يومً يعترض للصقر جول
والاّ تريـّحنا على ما جات جات = عموما أحسن حل يا زحل الزحول:
الذكـر من متشابهات ومحكمات = إقره ولا تنشد عن أسباب النزول !
[/poem]