( فارق التشبيه ) .. !!

السلام عليكم ورحمة الله .،

حيل الله أقوى وإنفاذاً لما تقرر : )

[poem=font="Simplified Arabic,5,black,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black""]

تعبت امن السهر وأثر السهر يثّر على راعيه = لو يقضّي لزومه .. لازم إنه يكحل عيونه
طرح وسمه على محجر عيوني ليه .. مدري ليه ؟ = وأنا اللي كل ليله محتميه وواقف ٍ دونه !
على وجهي بياض ٍ ما يقارن مع بياض وْجيه = وعلى وجهه سواد ٍ قاطع ٍ لونه مثل لونه
وأنا مع فارق الوقت أنتقل يا فارق التشبيه = تيامن رحلتي .. لو رحلتي ماهيب ميمونه !
على مقعد ذهاب اسنين من عمري ( حجزت أوكيه ) = تقادت .. والزمان الشين مفترٍ دركسونه
سلمت امن أوله والله وأعلم ويش في تاليه = ضمنت الأوله .. والتاليه ماهيب مضمونه
أسج الرجل .. وأطلق قيدها فالدرب يا ماشيه = ولا سجّيت والخاطر وقف .. واشطونه اشطونه !!
شريط أفل مكراته لأبو زيد .. وشريط أطويه = وأبو زيد الهلالي يرفع احجاجه بحاجونه
أبا أسوّي سواته .. وأعطي دروبه .. وأبا أجاريه = لو إنه مبتدع له سنة ٍ ما هيب مسنونه
يا ليت الليل ما يمسي عليّه لا نويت أسريه = ويا ليته لا نويت أسري معه يمشي على هونه
توجّهت ونسانيس الهوى ما تضبط التوجيه = تهب وتطرح الراس العنيد .. وتنصب امتونه
أعارضها .. وأنا ما كل قاف ٍ طارف آغنّيه = وأخالفها .. وأهندب لي قصيد ٍ مـ / أعرف لحونه
بغيت آقوم وأفرد كل ضلع امن الزعل .. وأثنيه = وخفت أقوم والصدر الوسيع يطيح مكنونه
تحت محني محاديب الضلوع العوج .. فيه وفيه = شموخ .. وخاطر ٍ مكسور .. وابويتات موزونه
تريّح يا ضميري لو أبكتب كل ما تمليه ؟ = أملّ امن القصيد ونص خلق الله يملّونه
يحلّ الطاري .. وهذا محلّه .. والله ايحيّيه = وكان الله في عوني .. وكان الله في عونه
أشبّ النار والجمر الحمر يحرق قدم واطيه = وأبو غليون جمره مـ / أحرق الاّ راس غليونه
تقولون الطبيب اليا لقى له جرح ٍ ايداويه ؟ = تراكم تجرحونه بالكلام اللي تقولونه !
عقب دار الزمان .. وقرّ راسه .. وأزعله مرضيه = على راس الوعل من حر كبده كسّر قرونه
يموت الشاعر اللي ليل عشّاق السهر يحييه = ويعيش الشاعر اللي من قصيده يخلص ديونه
لو إنه ما يلفّ .. وكل مرّ يمرّه يحلّيه = على رجله يلف الحبل أبو عقده .. ( وأبو غونه )
صحينا بعد غيبوبة ملذّات الهوى والتيه = وصاحينا ليا جانا يجيب أفكار مجنونه
ليا منه شهر صوته على ضلع ٍ عوى عاويه = عليه الذيب الأسحم كل ليل يحدد سنونه
عسى الله يصلح الجمهور .. ويعافيه .. ويخلّيه = وحال الناس وشلونه ؟ .. وحال الشعر وشلونه ؟
يا حظ اللي تعلّق فالمساجد والله مقدّيه = قبل روحه تعلّق بين .. ( زرتمْته ) و ( حنحونه )
[/poem]


وبس : )