قسوة عتابك !

السلام عليكم ،

أتمنى لها الرضا و القبول ،


[poem=font="Simplified Arabic,4,sienna,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
ياليتني ، قبل أقفّي عنك زعلان=طوّلت بالي على قسوة عتابك
الله ، وأنا أعوذ به من كل شيطان=واجهتك بشيّ ، ما جا في حسابك
ماني طبيعي معاك أحيان ، و أحيان=تنزل عليّ السكينه في رحابك
أشعلت لك في ظلوع الصدر نيران=لين أحرقتني ، وشبّت في ثيابك
على جنابك ، زهفت بزلة لسان=عنها ، ومضمونها ، يكرم جنابك
إي و الله إنّي على ما صار ندمان=ساعة تداركت ، وش معني جوابك
صحيح ما قيل ، ما يستدّ عجلان=شف كيف ينزف صوابي من صوابك
والله ، لو كان مالك داخلي شان=ما رحت تارك خفوقي عند بابك
من ليلة البارحه ، ما بتّ سهران=جازت من النوم عيني ودّها بك
إرحم عيوني معك يا خدر الاعيان=إسبوع ، ما خايلت بارق سحابك
إقبل ترى شوفتك تشرى بالاثمان=وإرفق بروح ٍ تعذّب من عذابك
ما كنت أحسّ بوجودك ، لكن الآن=عرفت قيمة حضورك في غيابك !
[/poem]