( قصايد )

السلام عليكم ورحمة الله وبركاته




مدري وش الطاري الأكيد انها للتواصل

بان وجه الحقيقه في عيوني وقلّت
ليت الأيام في هذا الزمن ما استوت

ليتني ما عرفت وليتني ما جهلت
ان الأحلام سيره اقبلت وانزوت

ما اذكر اني صحيت ولا اذكر اني غفلت
لين ما كل ضيقه في ضلوعي عوت

صاحبي لو اسرت الوصل والا قتلت
المحبّه على جمرة حطبك إكتوت

كم لقربك فتحت وكم لبعدك قفلت
صفحة ٍ لو طوتها غيبتك ما إنطوت

يا كثر ما استخرت وياكثر ما عقلت
والله أعلم مقادير العمر وش نوت !

غرّني كآس حبّك بالغرام وثملت
وإنت شمّعه من رياح الجفا ما ضوت

إعتبرتك مدينه وإعتبرني رحلت
لو جياع العيون الضاميه ما إرتوت

لمّلم دموع عينك والا انا إعتزلت
ودّي ابكيك لكن دمّعتي ما قوت !






...............................





غرّبتي درب وأيامي مشاوير
والشعر ليل قيّدني ظلامه

يا حبيبي طفح كيل المعاذير
في عيون المعاتب والملامه

ذكرياتك على بابي مسايير
بين غصنك وتغرّيد الحمامه

شاعرك ما فتح باب التعابير
غير يوم الغلا قلّ إهتمامه

كل ما جيت وأحلامي مغاتير
شفت لليآس في وجهي علامه

مخّلب الوقت وأنياب المقادير
تجبر الصدر وتكسّر عظامه

واقف الحزن في وجه التباشير
عقب لاحت مراسيم الندامه

يوم علّمتني كيف المخاسير
تسّرج شداد حبّك بالمسامه

اصدق الشعر ما يحتاج تبرير
واكذب الشعر يحتاج إبتسامه

كنت اشوفك على شان الغلا غير
لين قامت على الحب القيامه






.......................








تغيب الأفراح بحضور الغرابيل
لا صارت أحلامي أموات ومقابر

ما كنت خابر سنيني كذبة إبريل
والحين ماهي على ما كنت خابر !

علّقت صبري على ابواب المقابيل
لو كان حبل الرجا مقطوع دابر

يا مترفه شاعرك شبّ القناديل
بعضي نزف جرحي وبعضي يكابر

استضعف البعد لو ما عاد بي حيل
واستقوي القرب يا بنت الأكابر

كم لي وانا احييك وتموت المراسيل
من قدح الأوراق وزناد المحابر

لين الشعر ضاق بين الحط والشيل
والخاطر المنكسر ماهوب جابر

ماني مصّدق غرامك كذبة إبريل
لو كنت اشوف المحبّه طيف عابر !