كـــُــش مــــلك !

[poem=font="Simplified Arabic,5,black,normal,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
يا نديبي فوق جيبً ماهو بأيات جيب = أفخم أفخم جيب من صنعة عيال الحرام
لا يهمك كل كبري وتحويله وبيب = أنت سايق محترف من زمن عادك غلام
شد حيلك وإنطلق قبل شمس الله تغيب = خطك معبّد ولو صادفك بعض الزحام
هشـهم بالنور وإضرب عليهم بيب بيب = أنت مندوبي ولاهو يقيّدك النظام
أدخل الدمام وإحفظ بقايا الوصف غيب = وجهتك سبعه وثلاثين وأوضاعك تمام
فيه تلقى المجلس الشرح والصدر الرحيب = فالك الفنجال الأشقر ويقفاه الطعام
في ضيافة من يسهّل لك الأمر الصعيب = مقصد الخطّار والنور جلاّي الظلام
الرفيق الكفو وأكبر شرف صار النسيب = طايل الطالات نسل الرجاجيل الكرام
هاك هاك عبارته مايداني جيب جيب = في مسا في صبح في صفو جو وفي عسام
أبك هذا اللي يسمون طيب وقلب ذيب = وأي دربً تسكه معْه تلقى لك حزام
راح للديره ومسكو العرب خط الركيب = كنـّهم حجاج وجهتهم البيت الحرام
ولو نزل بشعيب راحو النشامى للشعيب = وأن توجّه شام راحو وساع العرف شام
يا علي يا عم يا شيخ يا الراس الصليب = يا بعيد الشوح يالصيرمي عالي المقام
يا علي يا عم يا شيخ يالوجه المهيب = إيه يا عد الروى وإيه يا حد الحسام
يا علي يا عم يا شيخ يالفذ الأديب = كلبو الألقاب صفت وصار إسمك إمام !
أنت راع الأوله من بعيد ومن قريب = وأنت خيّال العبيّه وفكاك الجهام
تدحم جنوب الرجاجيل وترد الذهيب = وتكسب الطاله وعلمك على الطاله شمام
تسمح المخطي وتثني على الرجل المصيب = وتاخذ وتعطي وتقبل وعداك الملام
يوم أسولف بك على راعي الجرح العطيب = ينبلج والجرح يبرى ويروون الحيام
كن ماغيرك لتكفى بذا الدنيا مجيب = من نصاك وصاح بك قمت له والحظ قام
والدليل وخير شاهد أنا من دون ريب = ما يشلّ أطرف جمايلك تسع إمية سنام
من معاريفك وش آرد يالشهم العريب = لأجل أرد أصغر معاريفك أحتاج ألف عام
وأدري إنك من فضل ربك البر الرقيب = ما تدوّر ردها والجمايل ما تسام
أنت تفعلها مع أقرب بشر وأبعد غريب = جعلها لك في سعاده ودام العز دام
وجعل ظنك فيّ لا جا لزومك ما يخيب = وجعلني لا رحت أجيب المطيه بالخطام
القصيده فيك ما حيّرت فكر اللبيب = يسرد أفعالك وتطلع قصيده ياســلام
من سكت عن كلمة الحق جعله في اللهيب = هافي وشيطان وأخرس وملعون وخمام
للحراج محرّجينه وللمنبر خطيب = للورى در يا منافق ويا صادق أمام
ودامني مومن ولي مع هل العليا نصيب = والله إن آميط عن كلمة الحق اللثام
إنتبه ياعمّ والذيب ماهو في القليب = بين سكان العماير وسكان الخيام
النقا ماهو سوالف تصيب أو ما تصيب = نـوّم الصاحين شف عكسها صح النيام!
مامدحتك مدح صوّاغة الهرج الرهيب = بس صارحتك بما فيك مافيها خصام
عمي وصارحتك بطيبك وباقي العجيب = بأذكر إن لك عيب ماعاد في الدعوى عمام
أنت عيبك عيب والعيب ماهو بأي عيب = والعرب يدرون واللي يقول إش ذا الكلام
قلت عيبك ماخذ الطيب كله طيب طيب = ما تركت لباقي الناس لو واحد جــرام !
[/poem]