تلويحة العشاق

السلام عليكم ،


طرت وجرت على عجاله .. لعلها مقبوله
[poem=font="Simplified Arabic,4,blue,bold,normal" bkcolor="transparent" bkimage="" border="none,4,gray" type=1 line=1 align=center use=ex num="0,black"]
أرفع يدك وأرفع يدي لا هبّ نسناس البراد= في خاطري كلمه لكنّ .. أرفع يدك وأرفع يدي !




لازم نعرف شلـــون نبذل للفراق الإجتهــاد= قبل اللقاء لا ينتهي على الوداع السرمدي




تلويحة العشــاق ما تنطاق لكنّ المراد=منها نفســّر كيف تنشف راحة الكف الندي




يا صاحبي علــّقتني بين التغليّ والعناد=وأنا قنعت أن الغلا مسكين .. والحبّ أجودي




ولـّعتني والنار أصاليها وتاليها رماد = وأنته لا قلت النار من شبابها قلت أبعدي




وضمّدت جرحي ثم تركت الجرح وأخذت الضماد=عطني ضماده من مشا درب المجاريح يغدي !




دايم تزلّ ولا تملّ .. وزلـّتـــك كبوة جواد = يا كثر كبوات الجواد اللي مع الخيل يعدي




منك وعليك المشكله والحلّ والعلم الوكاد= أني عطيتك ما بقى من عزمي وضاع جهدي




الصدر كائن حيّ لكن عيّ وضلوعه جماد=مقوّســه والقلب يآخذ قوس منها ويحدي




والحال ينقص والمحبـّه مستتـبـّه فـ إزدياد= حسبي عليّه .. ثم عليها .. ثم على الحظ الردي




العام أغني قلبي اللي لا يساق ولا يقاد=واليوم لا باللّه حنيّ يا مخايل وأرعدي




عوّدت أسافر بالتوجّد من بلاد إليا بلاد= قام الغرام الصح يلعب صح وأخلف مقصدي




أمّا يموت الحب .. ونعلن للمحبين الحداد =وإلاّ يعيش .. وتحفظه في ذمّتك يا سيّدي [/poem]



وسلمتوا ،