عقل وثقل ماتتبعك كل ماوميت

هي من قديمي ومن المحتمل ان البعض منكم سبق وان اطلع عليها ولكن اخترتها لكم لكونه اول مرة تنشر في هذا الموقع اتمنى ان تحوز على رضاكم واستحسانكم

لقد وردني بيت من الشعر في احد المواقع من احد الاعضاء برسالة خاصة يقول فيه

قلي علامك كل ماجيت صديت
وش رافعٍ نفسك تكبر علينا

وهذا ردي عليه
[poet font="Simplified Arabic,4,black,bold,normal" bkcolor="transparent" bkimage="" border="none,4,gray" type=2 line=200% align=center use=ex length=0 char="" num="0,black" filter=""]
ماهو تكبر يوم انا عنك صديت=مار الشهامه غصب تتطغى علينا
صحيح لاجيتي مكاني تخفيت=واترك لك الديره بلا ساكنينا
وان كان قفّيتي عن الدار له جيت=شفّقن على فرقاك وان تسمعينا
أنا احمد الله بالردى مالنا بيت=أن كان قصدك بالردى تشترينا
العشق ياما في دروبه تهقويت=ياما بلينا به وياما ابتلينا
كم مرةٍ من كاس عذبه تقهويت=وكم مرةٍ من زود جوره شكينا
وكم مرةٍ بفياض ريعه تمشيت=وكم مرةٍ من فوق شوكه وطينا
وكم مرةٍ بلحاف ضيمه تغطيت=وكم مرةٍ من زين طلع جنينا
وكم مرةٍ من هم ليلي تعشيت=وكم مرةٍ على المحاري سرينا
وكم مرةٍ ومن الوناسه تغنيت=وكم مرةٍ ومن التعاسه بكينا
وكم مرةٍ افرح لياقيل حييت=وكم مرةٍ اجزع لياقيل وينا
وكم مرةٍ يابنت انا منه ونيت=وكم مرةٍ والبعد لجله طوينا
وكم مرةٍ حافي قدم له تعنيت=وكم مرةٍ عن الخفايا شفينا
وكم مرةٍ للي لفاني تمنيت=وكم مرةٍ لي زاد فيه الحنينا
وكم مرةٍ في حق نفسي له اخطيت=وكم مرةٍ في حق نفسه خطينا
وكم مرةٍ اشبع وانا ماتغديت=في شوفته عن زادنا مكتفينا
كم مرةٍ كم كم وكم كان عديت=يخطي بها جمعك ولو تجمعينا
يابنت منهو لامني يوم قفيت=عن شوفتك ماضن يفهم بشينا
العشق قبلي عذب الحي والميت=وياما من انهار الغرام ارتوينا
عشقي قضى مع من خذا زينها صيت=ومن الهوى عقبه ترانا قضينا
الي يفتت حبه القلب تفتيت=خد وخشم وذراع كفٍ وعينا
زول وجسم وردوف لاماتماديت=في وصفها قصّرت ماجبت شينا
عقل وثقل ماتتبعك كل ماوميت=نسل الحرار ومنوة الغانمينا
ياما على شانه من القاف خطيت=وياما على قرب العشيره شقينا
وياما لها مع جور الايام حنيت=وياما لقربه غصب حنا شرينا
وياما علي شوفه نسوق التناهيت=ولاضنتي عنها دقايق سلينا
ياما عليها بأظلم الليل ناديت=وياما عليها نذرف الدمعتينا
وياما علي تزعل اليامني ابطيت=وياما عليها يفركّّن اليدينا
ماطيب انا لو عن عشيري تداويت=لو دونها بي جرهمّن السنينا
علمي بها كاني بعدّي تقصيت=تسعة عشر عامٍ تقافة علينا
ورى الغنم صبحٍ مع الترف مدّيت=يوم العرب منزالهم بالبطينا
امضيت معها اليوم حتى تمسّيت=حتى ظلام الليل فيه اكتسينا
تزعج معي بالصوت وان كان غنيت=بيتٍ عطيناها وبيتٍ خذينا
بالعيب مازلّة ولااضن زليّت=نلعب ومن درب الردا سالمينا
ومن عقبها شدّة وانا غصب شدّيت=وراحت مع اللي يذبحون السمينا
ولاني عنه بالكيف طوعٍ تخليت=يقطعني الله يوم عنها عمينا
لو تنشري بالمال لا ماترديت=لا أعد له حتى تقول اكتفينا
مار البلا بدربي لها اليوم لاقيت=بعض السلوم الي عليها مشينا
وبقيت دونه عاجزٍ لو تحديت=يوم ان ابوها قال قبلك عطينا
جانا ابن عمه شتت الشمل تشتيت=وهدّالبيوت الي زمانٍ بنينا
تستاهله عزالله انك تنخيت=والله يسمّح دربكم اجمعينا
==========
يابنت ماهي كبرة يوم صديت=مار ان مالي بالهوى وجهتينا
هي وجةٍ من خافيه ماتشافيت=ونسيت عقبه رغبة العاشقينا

[/poet]


مع كامل اسفي على الاخطاء الاملائية

دمتم بخير وتقبلو الف تحية وتحية من اخيكم

السنعوســ مضحي الشيبان ـــــــي