باب الميانه ؟

السلام عليكم ورحمة الله وبركاته


اسعد الله جميع اوقاتكم وكل عام وانتم بخير


نسمع عن باب الميانه ولا ادري من اول من فكه لكنه اختصر الكثير من الطرق واحيانا يسبب متاهات ويضيّع اللي يدخل معه

بعض الناس يدخل مع هالباب عرض ويحثلها شوي ,,

بعض العالم يفكر انه اذا بطل هالباب ان انهى كل شيء وراه وأي شي ممكن يدخله معه من هالباب


وبعضهم يحترم هالباب ويحترم اهله .. وبعضهم فاتح الباب على مصرعيه 24 ساعه وما طرى عليه قاله وسواه ,,


نبي نشوف ارائكم عن ذا الباب ,,


متى وكيف وليه ولماذا واين وبصركم ما يطري عليكم من الاسئله ردوا عليها لكن الاجابه مقاليه مطوّله شامله للشرح الكامل ويا حبذا لو جا في طرفها شي من المواقف ,,


(( رأيك عن الميانه مع من ؟ ومتى تصبح شماعه اعذار ؟ ومتى تصبح واقع وعليك ان تتقبله ؟ ومتى يجب ان تحترمها ؟ وكيف ؟؟ وما ذكرناه سابقا ً من ادوات الاستفهام ,, ))



والسلام عليكم ورحمة الله وبركاته

من باب الميانه يابوعبدالله

بقولك شكرا على الموضوع

ولي عوده

الميانه


اعتقد انها سهلة النطق ولكنها صعبة التطبيق عند من يجهل اصولها !!
شي جميل ان تصاحب علاقتك مع من تحب ( ميانه ) تكسر بها جميع الحواجز الرسميه والبرتوكولات الممله بينك وبينه .. وهي من وجهة نظري / تضمن استمرارية العلاقه وتدعمها وتساعد ايضاً على اريحيّة الحوار والمناقشه بين اصحاب هذه العلاقه


واتفق مع من يقول ان الميانه يجب ان يكون لها حدود .. وخطوط حمراء لا يمكن تجاوزها !!






هذا اللي دندن براسي .. ويمكن ارجع

الميانه ممكن تكون

عذر من يتعدى الخطوط الحمراءفي أغلب الاحيان

شكرا يامبارك علي هيك موضوع

( الميانه )

تكون مع / شخص .. يحبّك وتحبّه .. وتثق انّه يود لك الخير
امّا غيره .. باب الميانه مقفوووول

8
8
8
مثل ماقال ناصر

وشكرا على الموضوع الجميل

^
^
^
^

وين ناصر

هنا



بس قاعد اسوي تجارب .. علميّه
على الميانه مع النفس

أنا أشوف ان الميانه شيء جميل ان استخدمت في محلّها
وهي كفيله بازالة كل الحواجز بين الاصدقاء وتجعل العلاقه
شفافه أكثر وتكون بالميانه بلا تكلّف !

وهي سلاح ذو حدّين .. بحيث تكون ايجابيه مع الناس المحترمه ( شرواكم )
وتكون بالتأكيد سلبيه مع الناس الغير محترمين ( حاشاكم ) ..!


انتهى

الميانه مع شخص تشك بغلاك عنده فأعتبرها اهانه لنفسك

:

هناك ياعـزيزي من يـفـسر (( الميانة )) بأنها اعـتداء على الآخـرين

وتساهل بإطلاق أبشع الكلمات وكلما ازدادت (( الوقاحة )) ازدادت (( الميانة ))

وهـناك من يـرى (( الميانة )) هـي الاقـتراب من الشخـص أكـثر ومعرفـة ظروفه ومعـرفة

طـريقة تفـكيره وبـ التالي التـصرف وفـق ما يناسبه وما يروق لـه مع الحفـاظ على جسور

المحبة والإخوة

لك شكري واحتـــرامـي

انا اقول ان الميانه درجات



في درجه ثالثه
و
درجه ثانيه
و
درجه اولى



الدرجه الثالثه ... هذ تستخدم مع الزملاء في العمل و الاشخاص اللي تختلط معهم ولكن ليست بصفه دائمه يعني في الاسبوع مره والا في الاسبوعين مره وهذي الدرجه من الميانه ما تكون ميانه كبيره يعني ضحك وسوالف وهاه يعني بس ما يدخل في العمق وااااااجد يعني ميانة مكان .




الدرجه الثانيه ... تكون لبعض الاصدقاء اللي دايم وانت معهم تروح وتسافر معهم وتخاويهم وتواجهم بشكل يومي وتكون اقرب من الدرجه الثالثه بكثير يعني تعلمه ببعض الاسرار الخفيفه اللي ماهيب في العميق تمزح معه بشكل ودي وباراحيه وتعرف انه مهوب بزاعل وبعض هذي الميانه تاصل لمزح باليد للي يتقبلون المزح باليد .




الدرجه الاولى .. هذي الدرجه اسمها الحوا واعروقها .. ولا تطبق الا على شخص او اثنين في حياتك فقط وهولاء الاشخاص تعدهم في مقام اخوانك بل يمكن اقرب منهم لقلب نفسياَ وهذا النوع من الميانه تصل الى اخر حدود الميانه .




موقف مياني ....


يقولون به رجالٍ مسؤول في احد الوظايف العسكريه جوله اثنين من فراده الى البيت على شان يستاذنون من على شان صار لهم حاله طارئه في ديرتهم وديرتهم بعيده عن مكان وظيفتهم وكانت ذيك الايام حالة طواري في الدوله ويالله يالله الرجال يعين له يوم والا يومين يسترخص فيها ويوم جو البيت ويعينون رجال في المجلس من جماعة ذا المسوؤل وسئلوه منه قال مهوب موجود .. امروا اخدمكم بشي قالوا لا سلامتك نبي منه يرخصنا انروح لاهنا كم من يوم قال الرجال ذا وكم يوم تبونه يرخصكم قالوا يومين والا ثلاثه قال لهم الرجال روحوا لكل واحد منكم اسبوع اجازة مني قالوا يارجال هذي عسكريه ونخاف المسؤول ما يوافق قال انا فلان بن فلان ولد عمه واخذوا العلم مني
انا امون عليه والله يستر عليكم الله اللي عطاكم مهوب انا قالوا : اوكاد قال : افااا ...
راحوا الرجاجيل ويوم عود المسؤول لللبيت لذا الرجال اللي من جماعته يعلمه بالعلم قال تراني ارخصت الرجاجيل على احسابي وانا امون عليك وعطيتهم الاجازه قال المسؤول انت تمون بس حنا في طواري اربك عطيتهم يومين والا ثلاثه قال الرجال راعي الميانه يارجال لا عاد تقول شي عطيتهم على اسبوع اسبوع




الله الله .. طراها الميانه



ابو عبدالله ردي اكبر من موضوعك

.

ماكل رجل يفتح له باب الميانه

ومن فتح له بابها فلا يكون على مصراعيه

.

__الميانه__

من وجهة نظري .. هي كسر حاجز الرسميات مع من تستطيع أن تفكر أمامه بصوت مرتفع !!

ومما لا شك فيه أن كل " كل مازاد عن حده ينقلب ضده " ..

ومفهموم الميانه يختلف من شخص لآخر , فالشخص الناضج يرى أن الميانه طريقة راقيه لفهم وجهات نظر الطرف الآخر وتوجهاته بطريقه واضحه ومباشره ليصل من خلالها إلى مساحة مشتركة من التفكير تكون أساس قوي لصداقة ناجحه

وأحياناً تكون الميانه من طرف واحد (( يكون وجهة عريض )) يستغل طيبة الطرف الآخر الذي غالباً مايكون متحفظ وغير جريء .. وهذي الميانه إللي تمغث !! لأن اللي وجهة عريض يرى أن السلف الذي يكون تحت بند (( الجيب واحد)) ... ميانه !!! وفى أغلب الحالات يكون الرد مثل حلم فلسطين .. لأن الميانة من وجهة نظر إللي وجهة عريض تبيح له عدم السداد من منطلق (( أن الجيب واحد))....

وهناك من يرى أن الميانه عذر مقبول للتهرب من الواجبات (( اللي مال الرجال مصد عنها ))..... وتكون بهذة الحاله .. شماعة أعذار وغالباً تكون الأعذار وهميه لأن الكذب مشروع عند هذة الفئه التي تضعه تحت بند الكذب الأبيض !!


* متى تصبح الميانه واقع يجب تتقبله ؟؟
أعتقد أنها لاتكون أمر مفروض إلا على من تكون شخصيتة ضعيفة .. أو له مآرب أخرى يتحمل من اجلها الميانة ... أو من اجل عين تحشم ألف عين لأن في هذة الحاله قد يقبل الشخص ميانة مزعجة احتراما ً لشخص اخر عزيز شاءت الأقدار أن يكون مرتبط معهم ..


* متى يجب أن تحترم الميانه ؟؟
أحترم الميانه عندما تكون من شخص اثق بأنه يحترمني وتربطني به روابط وأهتمامات مشتركه ..اذا كانت بأسلوب محترم أو مزح معقول يفرضة الموقف والحدث


* متى تكون الميانه مقبوله .. وكيف ؟
أحترم وأقبل الميانة عندما تكون من شخص قريب من عمري أثق به وميولاتنا متشابهة .. واحترمها اكثر اذا كانت بيننا عشرة !!


* مثال ..للميانه المزعجة المنتشرة بالمجتمع وأعتقد ان الكثير ابتلا بها ؟؟

أغلب المعاريس .. يواجهون في ليلة الزفاف او صباحية العرس أسئلة وتعليقات وتدقيقات من أشخاص قد تكون العلاقة معهم عادية او سطحيه او رسميه وتكون بلا مقدمات من باب الميانة طبعاً ..ومايزيدها وقاحة تمادى وجرأة السائل !!!! الذي يرى الامر عادي والتجربة تعميم ...


..و الميانه موضوعها متشعب وأساليبها مختلفه وأحيانا متخلفه , اكتفى بما ذكرتة ..

ابو عبدالله

ذكرتني بواحد يقول لصديقه الوسيم

بيني وبينك لا تطيح الميانه // إلاّ ليا جوّزتني من خواتك !





بالرغم ان هناك الكثير من الانساب العلاقه جامده بينهم والميانه مرتكزه ولم تسقط على طول تاريخ النسب بينهم


الحقيقه انه موضوع متشعب وله عدة مناظير
لكن المؤكد أن الميانه أن لم تكن بدوافع مقنعه اصبحت لقافه !


سلمتوا ،



..

:
:

أحسن شي أن (( الميانة )) لها (( باب )) .. !!
والباب له (( قفل )) نسكرة بـ (( مفتاح )) .. !!
لذلك من الممكن ..
أنك تسكر هذا (( الباب )) أذا (( قفل )) مزاجك على شخص (( مستمين )) عليك .. !!
لكن المتعب احياناً لو صار هالباب (( مخلوع )) ..
وأبتليت بالملاقيف .. سوا اللي يداهمونك والا اللي يتهايقون ويروحون .. !!
عندها مالك الا أنك تنظر فيهم وتضحك .. !!
عموماً باب الميانة لايفتح الا لشخص تعد قلبك (( بيت )) له ..
او له (( نافذة )) عليه .. !!

في تصوري أن الميانة (( شهادة )) ومنحة ينتزعها الشخص الناجح ..
بكامل رغبة الطرف المميون عليه .. !!

وأكتسابها تحتاج الى مهارة وقبول .. !!
أما أذا كثر عدد (( الماينين )) عليك .. فلا تنزعج ..
ربما تكون أنسان محبوب .. !!

الميانة تكون مع الغالين فقط والا غيره المفروض تكون مقفلة ولاهي مفتوحة من بعض الناس
لانهم على قولتك يابوعبدالله يفلها ابوالشباب ولاعاد تقدر ترده


.
.

حج مقبول يابوعابد

وانا اقول ان بعض الميانه ( اهــانه )

لأنك انت من فتح هذا الباب ولا تستطيع ان تقفله مره اخرى


فلا تفتح هذا الباب الا مع من يحترم هذا المسمى

ومع شخص يحترم نفسه اولا حتى يحترم الشخص المقابل بعد ذلك


ومن باب الميانه لاهنت يابو عبدالله على هذا الموضوع الجميل

رأيك عن الميانه مع من ؟

الميانه جميلة بعض الحيان وتصلح مع الاصحاب الاحباب لكن لابد ان تكون في المعقول اي ماتتعدا الحدود وميانة الاخوه هي الاهم شي او من هم في مرتبتهم.

متى تصبح شماعه اعذار ؟
لامنك حطيت نفسك عرضة للعالم وقلت بفعل وبسوي ومن عقبه تعذرت بعذر ماهو سمين
متى تصبح واقع وعليك ان تتقبله ؟
؟؟؟؟؟؟؟؟؟؟؟؟؟

متى يجب ان تحترمها ؟ وكيف ؟؟

الميانه تحترمها بإحترام من أهلها اللي امامك يعني اللي يعرف متى يستخدها

وما ذكرناه سابقا ً من ادوات الاستفهام

ولي عوده لان الموضوع جميل ورائع لاهنت ياابو عبوود

الأخوان كفوّ ووفوا
ولاهنت

دائماً يابوعبدالله تقتنص المواضيع الاجتماعيه اللي ماتطري على البال ..


موضوع مهم للغايه ، ومثل ماذكروا الإخوان اعلاه ، لها حدودها مع أشخاص وعلى درجات ..


ذكرني موضوع الميانه بموظف مصري معي في الدوام ، الأخ المصري مطيّح الميانه مع الموظفين
وزايدها حبتين ، طبعاً بغض النظر عن الكلام اللي يطلع من بؤّه في الامور الرياضيه ، الأخ تطرق
لأمجاد دولته في حرب اقتوبر ( اكتوبر ) ، طبعاً الأخ ظللّه الإعلام عن المعلومات المهمه ، شطح حبيبنا للخليج و( السروه ) اللي متكاثرها علينا ، حتى وصل به الأمر لحكام الخليج ( حدّه راهي ) ،
المهم أن الكلام وصل للمراقب ( وفنقره ) بقلم ذهبي ، لدوام يبعد عن ( شئة ) العمر حوالي ساعه مع الزحمه .. الوكاد إني فقدته وفقدت شطحاته وسألت عنه قالوا المراقب يبي يفتك من لسانه لايسحبونه امن الدوله ، دقيت عليه وقلت وش عند المراقب ناقلك !! قال :- خليّها على ربنا ، الراقل
دا فاكر نفسه في اصرائيل ، خد بالك منّه يامحمد وماتديّه وش ..

الظاهر إن ميانة المصري مع المراقب ودّته في خبر كان .. طرّاه مواقف الميانه ..

^
^
^

فهمتوا شي ادري لا حتى انا مافهمت