تاريخ الصقور في (101) بيت

بسم الله الرّحمن الرحيم
أيّها الإخوة ,والأخوات في هذا المنتدى الأكثر من رائع,والذي يقف عليه شاعرنا الكبير
(حبيب العازمي),ورفاقه المخلصين
السلام عليكم ورحمة الله وبركاته
يسرني ويشرفني أن أنضم إليكم لأفيد وأستفيد,ولقد تلقيت دعوةً من أخي الشاعر/محمد الجعيد
(سنجار) شاكراً له حسن الترحاب,كما أنني أصافحكم بهذه الملحمة الشعرية والتي كنت قد
أهديتها إلى مولاي خادم الحرمين الشريفين الملك/فهد بن عبدالعزيز رحمه الله واسكنه فسيح جناته
وذلك قبل مايقارب العشر سنين وقد منحني رحمه الله خطاب شكر بمثابة وسام أعتز به
دوماً ذلك أنني تناولت جوانب من تاريخ الدولة السعودية الثالثة,وتناولت الكثير من الأحداث والمناسبات والتي ستعبر عنها القصيدة
هذا والله أسأل أن يجمعنا على الألفة والمحبة وعلى الكلمة الطيبة في ظل حكومة مولاي خادم
الحرمين الشريفين الملك/ عبدالله بن عبدالعزيز حفظه الله ورعاه

[poem=font="Simplified Arabic,5,darkred,bold,normal" bkcolor="transparent" bkimage="" border="solid,4,black" type=2 line=1 align=center use=ex num="1,green"]


تكفى ياعام الفيـن واثنيـن عُـودي=عُدْ قرن واعوامٍ ثلاث إرجع ا سنين
يمكن نشوف الصّقر طاوي الحدودي=ومنزّل النّعرات مـن روس غاويـن
حُر ابترم بالليـل عـاف الرقـودي=عاف المكوث اللي على غير تمكيـن
إشتـاق للمربـى وآل السـعـودي=واحتَرْ مـن قومـه بـدار المحييـن
ماقال ابسلَـمْ واستطـاب القُعـودي=والا تعـذّر مـن رجـال ومزاييـن
نفض غبار الخبت باقصى المهـودي=ثم إعتلى الشرقـي وريّـح بيبريـن
رسم بيبريـن الخطـط والمجـودي=يسوقه الرحمـن والنـاس غافيـن
الله واكبـر يـوم شـق النجـودي=وليـاه بالمصمـك يحـط الجناحيـن
خلّى القطا هي والرخـم والقهـودي=تجلى عن المصمك وذيك الرياضيـن
من بعدهـا خبّـر مخبِـر سـرودي=المُلـك ل الله ثـم للصقـر شاهيـن
الله وهبـه الملـك يومـه يجـودي=عطاه للـي ينصـر الحـق والديـن
وتأسست دولـة عريـب الجـدودي=قامت على الإسلام مصحف وتسنيـن
ماعـاد بـه عجـلان والا رشيـدي=ماعاد به خالـد وعايـض وياميـن
حتى الشريف اللي تولّـى السنـودي=ولّى عن الديـره بصفـق النياشيـن
بيّن للاخـوان الطريـق السـدودي=وأخمد رفاده والمناوي و(عجمـان)
والباقيـات الصالحـات الـركـودي=مميزين العلـم مـن غيـر تحزيـن
وتوحدوا العربـان حتـى المـدودي=كلاً عرف حـده ووضـح العناويـن
واخرج بدعـوه طيبـه بالهجـودي=ثروة بـلاده مـن وقـود ومعاديـن
خدم بهـا دينـه ورسّـى الوتـودي=وأرسى لنا الرايه تشـوق الملاييـن
غفيت ياصقـر الجزيـرة الجلـودي=وسْط الرياض وبين ربـع ومحبيـن
ودّعتهم يوم الأجـل عنـد عـودي=ودّعتهـم والدمـع بايمـان ذربيـن
بعـدك يابوتركـي رجـالٍ تسـودي=علـى خُطـى بينتهـا دوم ماشيـن
منهم سعود اللي من أول عضـودي=أبلى بجهـده وزيّـن الـدار تزييـن
والفيصل اللي حد بعـض الزيـودي=حشد لصهيـون الجنـود المتاقيـن
قطع عن أهل الغرب خط الوقـودي=لجل العرب والقدس تبقى لفلسطيـن
من بعدهـم خالـد بخيـره ينـودي=أضفى المقصّب فوق روس المساكيـن
واليوم جاء عصر الفهد والفهـودي=رمز السياسة والتطـور ل هلحيـن
هو خـادم البيتيـن عنهـا يـذودي=وموزّع المصحف على كـل حييـن
وسّـع بيـوت الله لـلامـه وزودي=وارتاحوا الحجـاج واللـي مصليـن
عسـاه يبقـى ذخرنـا بـالأبـودي=شيخٍ ذرانا مـن فعـول الشياطيـن
منهم عريبي داهم اللـي سجـودي=في يوم نازي مع جماعـه وناويـن
بيّدهـم الزيـزوم بـام الـزنـودي=وارهف لهم حد السيـوف المكاميـن
ثم التفـت وليـن هـاك الحشـودي=تحتـل بالباطـل ثـرى ناس وافيـن
قال انت ياصدّام مخطـي جحـودي=نسيت يوم أبعـدت عنـك البعيديـن
ثم ارتكى لـه ليـن تـل السكـودي=بالبتريوت حتى خرج من( دسمـان)
ناهج علـى نهجـه حكيـمٍ ورودي=أحيـا تـراث أجدادنـا بالشراييـن
عضيد فهد اللـي تولّـى العهـودي=عبدالله اللـي زار تكسـس وبكّيـن
حرس وطنـا مايبـي لـه شهـودي=يمشي مع ابن الدار واللي مقيميـن
محلى التواضع منه ويـا الزهـودي=محلى انبساط الوجه قبـل الأياديـن
ياسيّـدي ليتـك تعيـش العقـودي=اللي بقت من عمـر الايـام. آميـن
والنايب الثانـي سـواة الرعـودي=سلطان يعرف منتهى الشـد والليـن
كمّل لنا جيـش النشامـا الأسـودي=الواثبين ليـا أقـرع الطبـل دنديـن
والنايف اللـي مايعـرْف السهـودي=يسهر على امن الشعب عينه تراعين
وبـو فهـد سلمـان رجـلٍ ودودي=اللـي يلـم الشمـل مابيـن نائيـن
يبني قصور الخيـر يبـذل جهـودي=خيره يعم أرضه وبعض الأراضيـن
عقّب لنا سلطان هـاوي الصعـودي=اللي اعتلى بالجو نسـل السلاطيـن
الرائـد الأول ليـعـرُب ريــودي=بيساره الدنيا ومصحفْه ب يميـن
ماشفت ياصقر الجزيـره الطـرودي=أحفادك اللي فعلهم جـاوز الصيـن
فهد وفيصـل فعلهـم بـه نشـودي=يرحمهم الله كانوا بالخيـر ساعيـن
خلوا الرياضه في بلدنـا الصمـودي=تاصـل لعالمهـا وترجـح موازيـن
وهاذي الرياض اللي تجيها الوفودي=هي للثقافه العاصمـه بعـام الفيـن
شوف الطُرق وجسورها اللي صلودي=والنور والهاتـف تعـدى المياديـن
شوف المدارس والمساجد وجـودي=والماء ومستشفـى ودور المسنيـن
حتى السفر ماصار فيـه الضهـودي=بوينق /باص/ قطار/ والسفـن راسيـن
كلٍ بنـى بيتـه بسـاس وعمـودي=يحفر بيار ويـزرع النخـل والتيـن
ياخذ من الدوله قـروض ورفـودي=يانعمـة الله نحـمـده لاتزولـيـن
الله ثـم الشيـخ ثـم الـرصـودي=مابعـدهـم ماقبلـهـم يامنيفـيـن
وشلون خاينهم بعـد ذي العـدودي=يقوى على الخونه ونصب الشراكين
وين اليميـن ويـن ذيـك البنـودي=ويـن الأصالـه والوفـا ياخبيثيـن
حقك من الشرع اكتمل يا الشـرودي=ماهو من القانون لاصـرت لاجيـن
والمُلك بـاذن الله مـادام الوجـودي=يبقى لمـن بيّـه تعـب بالرياشيـن
عز الله انك كنـت قبـل الشحـودي=تنعم بعيش ومـال عنـدك دربزيـن
لو ماأنت مخطي ماتغطي الخـدودي=اللي ربت في دار مغلـي القريبيـن
ماينقصـك يابحـر قطـره تحـودي=ماينقصـك يـا بـر ذرة غبـاريـن
ياديرتـي حبـك مكـن بالكـبـودي=ياشيخنـا نفـداك بالـروح والميـن
يالله يارحمـن زيــل اليـهـودي=مـن الديـار المسلمـه والمضليـن
دمّر بعـد شـارون هـاك اللكـودي=اللي وطى الأقصى على غير تثميـن
والروس دمّرهـم بذيـك البـرودي=اللي عثوا الشيشان من دون قزوين
وانصر بعد أفغـان واللـي كـرودي=واللي كسوفي واذربي عين يامعيـن
والصرب دمّرهـم بحـربٍ تبـودي=واجعل بني البوسنه والالبان هانيـن
الماضي اللـي راح مـاضٍ تلـودي=عـرب واسـلام ومعـارك بحطيـن
قادوا العجم والفرس والروم قـودي=واليوم بين الشرق والغـرب جاثيـن
نبكي على الـدّرة وذيـك الهمـودي=والحيل طايـح ماتحـرّك ظلاعيـن
نشجـب ونستنكـر ولابـه فيـودي=قمـة ورا قمـة ولابـه مضاميـن
لجل الشباب اليوم صـاروا مـرودي=واتطبعوا بطبـوع نـاسٍ غريبيـن
ماظنتـي يرجـون جنـة خـلـودي=والا يعـزون الوطـن والمرفّـيـن
لابس بلوزه وجنز لبـس القـرودي=والشعر كابـوري وقصـة تكاريـن
متأثـر بمايـكـل وفـايـد ودودي=مدمن على الكوكتيل من عقب تدخين
يلعب بالانترنـت يضبـط وعـودي=يرسـل بجوالـه رسايـل لشيريـن
لو جبت له مفطّح وضلـع القعـودي=قام وتفجّـع قـال وش فالمواعيـن
ياكل بطاطـا فـوق تونـة قلـودي=والا بعد بتـزا وكتشـب ونارجيـن
ماجـاك بعلـوم الرجـال القـدودي=هرجه عن الفديو واوربت وببسيـن
ماتعزلـه عـن مبـرزات النهـودي=ومسلهمات الخُرس في بار مركيـن
راكب شبح واحيان ماكس وفـرودي=وليا رسب تشري له امـه سترويـن
أزعج بها العُقّـال صـارت لهـودي=والا انتهى معهـا بسرعـة مجانيـن
حيث الأبـو والأم ماهـم شـدودي=بفلوسهم والموت صـاروا محازيـن
يابـو محمـد والوليـد وحـمـودي=يـاام النشامـا والبنـات الأديبيـن
أنتم مدارس قبـل كتـب بجـرودي=وانتـم نـواة التربيـه والمربـيـن
دوم اسألوهـم لا تصيـروا لبـودي=ثم احفظوهم عـن مجالـس فليتيـن
من صلبكـم امـة محمـد جنـودي=من صلبكم شعب الفهـد ياعريبيـن
مايحتمـل الفيـن حـيٍ يـمـودي=واللي يمـود اليـوم ياكيـف يثبيـن
والعيش بعد الفين صايـر عنـودي=حكم القدر طبع الزمـن ياعزيزيـن
يالله يامهـلـك قبيـلـة ثـمـودي=ياواهب سليمـان ملـك ومخازيـن
احفظ لنـا فهـد العـرب والبلـودي=والدين وحماته ومـن فيـه داعيـن
وارحمني يارحمـن بعـد الرجـودي=اغفر ذنوبي تب على كـل مخطيـن
شابت قوافي الشعر قـل الحصـودي=واستنفذ الصقر الخبـر بالمواطيـن
والعذر يا اخواني على ذي الردودي=ان زل بي الهاجس على ناس غالين
وان ما عذرتوني على ذي القصودي=الـروح ويدينـي لكـم ياسليلـيـن
ما حرّك الهاجس وحرفي الجمودي= إلا الفهَد يومه حكم قبل عشرين
والختم صلوا عـدّ نجـم و ورودي=عدّ البشر والطيـر عـدّ الرياحيـن
وعداد مازف البحر مـن صيـودي=على النبي محمد ختام النبيين[/poem]

دمتم سالمين
محبكم/خلف بن عبدالعزيز الثمالي