الشاعر : عبد الله بن نايف بن عون

أحبتى هنا
بناء على طلب أخى الغالى : محمد بن هضيبان
تزويدة أخر جديد الشاعر الرمز : عبد الله بن عون
فقد قمت بتزويدة أخر ما كتب وهى قصيدة فى
سمو : الشيخ : راشد بن مكتوم
حيث خرجت بالصيفيه أبان تواجد الشاعر بالطائف
وقصيدتين من قديمه
[poet font="Simplified Arabic,5,white,bold,normal" bkcolor="transparent" bkimage="http://www.zizooo.ws/gallery/09/028.jpg" border="none,4,gray" type=2 line=200% align=center use=ex length=0 char="" num="0,black" filter=""]
لى ذوق والعالم كذالك لها ذوق=وذوقى عن اللى ما يجوز إمتناعى
وإليا لقيت بضاعةٌ ترفع السوق=فى مشتراها أبذل جميع المساعى
ولا بعد سيست لى ساس طاروق= ألا على الجال العزاز الرفاعى
وفالاتجاة اللى جذبنى له الشوق=ركزت ثاقب نظرتى وإطلاعى
من عام هجسى يتجه شرق ويتوق=مثل النداوى يوم يدعيه داعى
وبعد وردنى داعى الشيخ مسيوق =نكسب شرف تنفيذ الامر المطاعى
وأصير أنا السابق ولا نيب مسبوق=من نجد والمنصى وزير الدفاعى
فالديرة اللى شانها شامخٌ فوق=فى ظل حاكمها طويل الذراعى
الشيخ زايد جارة الله من العوق=اللى دقم عنها سنون الافاعى
أسس دعايمها على متن شاهوق=وحافظ عليها عن جياع السباعى
لين أصبحت تزها فلانظار وتشوق=وتأخذ هموم اللى بعينه يراعى
خلا صحاريها بساتين وعذوق=فالصف الاول فالمجال الزراعى
وأرجع لوصف دبى عن عد مأثوق=يعدله عدٌ يشد إستماعى
يقول فيها رونق العز مرموق=بأمان ومن المفترق والجماعى
مكتوم بجهودة تسامابها فوق=بسيرٍ حثيثٍ ما وراه إنقطاعى
والشيخ أبو راشد حضنها عن البوق=وبين الدول وضح صداها الاذاعى
ويوم اهتمامه صار فى جيدها طوق=تميزت فى مجتمعها السباعى
مثل الهنوف اللى لها القد ممشوق=اللى نسبها يشترا ما يباعى
درت خليج ما سلبها بمفتوق=لامجاد أهلها فى سماها شعاعى
وحنا نصيناها بمفتاح صندوق=صدرٍ لاهلها بــه ر حــب وإتساعي
حب الوفا لاهل الوفا ساقنى سوق=غيــر الـــوفـــا والقــدر مــالـــي دواعــي
الأ عزيمه بــــاسـم برقـــا وإســم روق= ونبا نكررها نهـــار الــــوداعى
من شان تأخذ فى هذاليل ساحوق=أيام بين جبال نجد المقاعى
لجا على أعلا نجد رعاد وبروق= والسيل ضاقت به بطون التلاعى
ومعك أشقرٍ جبر العضا مابه دقوق=قرناس ريشه مثل ريش المراعى
مطروحٍٍ أول نزلت الطير بسبوق = يعجبك وجهه لا خذيت القناعى
اليا صـــفى وجهـــه علـــى الطلع بصدوق=وجه الشجـــاع اللــي بحقه يداعي
يرهى على برقا الجناحين بلحوق=ليا شافها فاعت على البعد فاعى
وتدوج ومضّحاك فى جال مشقوق=ومضواك فى بيت الشعر والشراعى
فى خايعٍ بيت الشعر فيه مطقوق=يبنونه اللى ينهضون الرباعى
ويعرض عليك أصناف من خيرت النوق=وضحٍ مراثمها عليها الرقاعى
وضحٍ لنا فيها ملذات وطروق=معها نجوب فجوج نجد الوساعى
فيها أوضحٍ من طلعت سهيل مطلوق=أما على الاثناى و الا رباعى
عليان من عليان فيه أصل وعموق=مثل الذهب ما يلحق أصله نزاعى
وان كان جازت لك فلا عنك مفهوق=حيث أنها ما غير عبر ومتاعى
واللى لهم مثلك مواجيب وحقوق=ما هيب غاديتٍ علينا ضياعى
يالشاعر اللى لك بالامثال غدروق=طرايفٍ مثل الدوا للوجاعى
ما حاورت بيتٍ من الكتب مسروق=جوعا الهزاله بالجزاله شباعى
وبينك وبين الطيب ميثاق وعموق=أمــا قــــرابـــت جــــد ولا رضــــاعــــي
وسلم ودم ما شعشع النور بشروق=ويدوم عـــزك يــــاحمـــيد المســـــاعـي

[/poet]



وله أيضا وهو بأرض كان فى فرنسا الاتيه :

[poet font="Simplified Arabic,5,white,bold,normal" bkcolor="transparent" bkimage="http://www.zizooo.ws/gallery/09/374.jpg" border="none,4,gray" type=2 line=200% align=center use=ex length=0 char="" num="0,black" filter=""]
يا كان من ليلة على أرضك تساويت=عيـا وفـاقـك لا يـلايــم وفــاقـي
لـو كـان فـالـضـيـفـان مـا قـد ترديـت=وجـوك مـتيع و تعتني بالطراقي
من يـوم طـبـيـتـك و أنـا مـا سـفهليت=لـعل مـا يـبـقى لأهـالـيـك بــاقي
حاولت أوسع خاطري فيك و أزريت=بيني و بين أطـباع أهلك انشقاقي
والـيـوم غـايـة رغـبـتـي لــو تـمـنـيت =فـرقـاك و أنته ما تبى إلا فراقي
والـلـي علـى بـعـده مـن الـبـعـد حنيت=وينتابني عقـب الـحـنين اشـتياقي
نجد وهواه و شوف هـاك الـسبـاريـت=اللي لها في وسـط قلبي رواقـي
ومنـادمـة روس الـرجـال الـمـنـاعيت=كل أبلجن له فالطــويلــة مـراقي
ولـحـدٍ يـواخـذ ني لـيـا قـلـت هـاويت=وضح ٍ تفرق ما اجتمع من ضـياقي
وضـح ٍ لـيـا مـنـي مـن الـمـدن مليت=معها انشراحت خاطري وانطلاقي
أمـا لـيـا ســـنــدت و ألا لـيـا نـحـيـت=مــع درب براق ٍ سر اله شعا قي
برق ٍ سرى يوضي كما يوضي الليت=بعروض نوى ٍ ساق مزنه وساقي
وتعـرضه من رايح الشـرق تـثـبـيت=يثني على الريض أرقاب السباقي
ليا شفت براقه عـلى سيله أرهـيـت=بيـض مـراهـيـشه مطرها حقاقي
تـذبـح لـهـا حـي ٍ و تـحـييـلـهـا مـيـت=وتصبـح به الوديان مثل السواقي
وأمـا تـحـاسنت العسـاسـه و عســيت=ومشيت مـع سيـلـه و نـبـته دقاقي
وألا على دربه ليا أصبـحـت شـديت=وخــلـيـتها تـاط الـحـثـم و الرقاقي
وضح ٍ ليا احتست و شافتني أنـويت=قـامـت تسـوق أنـفوسها ما تساقي
تنجال مثل الصيد لا صحت وأوميت=وألا لـيـا طـق الــلـبـيـد الـعـراقي
يـجيـك مـمـشـاهـا تـبـارى تـفـاخـيـت=مافي بعضها عن بعضها انفهاقي
ولو حال من دون المعشى مراريت=تـرهي عـلـيـه مـعـربـات العماقي
من ساس وضح ٍ فالجز يره لها صيت=عـلـى مخــاذعــهـا تـلوح الحلاقي
ولـيـا تـثـنـت في نـبـات السـواريت=في خـايـع ٍ لأرقـاب نبته زراقي
غـادي بـوسطه لأم سالـم زغـاريت=وفـيـه الـزبيدي مثل بيض الطـواقي
ثـم جـيـت فـأولـهـا وللـنـار شـبـيـت=وقضب عـراقـيب الدلا ل الشلاقي
مـا غبطك يا للي فـالحضاره تلويت=يا موالف الجدران ويش أنت لا قي
لو كان فالحصن الحصين اسـتكـنـيت=وتــقـول أنا مرتاح ماني بشاقي
كـانك عـلى هـالأنطـواءى استـمريـت=وسـويـت مـع بـث القـنـاة اتفاقي
أمـا مـن السكـر شبعـت و تـرويـت=وألا بصرك أوشك على الاحتراقي
سج النفس واضرب دروب الخراريت=لو ما تذوق مع الخلا مـا يـذاقي
ما ينطوي في غرفة ٍ فــأخر البيت=غير الذي راسه يـبـيـلـه عـراقي


[/poet]



وله قصيدة مسندة للشاعر (( البستان )) أطال الله فى عمرة : محمد بن خلف الخس المطيرى
ولها مردود ولكن لايحضرنى الان
الاتى :

[poet font="Simplified Arabic,5,white,bold,normal" bkcolor="transparent" bkimage="http://www.zizooo.ws/gallery/09/024.jpg" border="none,4,gray" type=2 line=200% align=center use=ex length=0 char="" num="0,black" filter=""]
يابوخلف مات الهوى عقب ما كان=حــيــا ً يـغـذنـه لـيــال الـمـرابـيـع
إلى مال عربان ٍ على أطراف عربان=وباطرافهم جاء للطوارف تـنـاشـيـع
وليـا حصل عقب المرابيع مقطان=وتقاطروا فوق الركـايـا الـمـفـاريـع
ليا قطبت عد ٍ من الريف طـربان=سمر البيوت اللي تسـد الـتـرابـيـع
يحف شرقيه خــوالــد و مـطــران=وشمر يحفونه من الـغـرب وسبيع
ويرده من المظما دواسر و عـتـبــان=و مـن كـل بـد ٍ لـلـوسـايـم تناويع
بدايد ٍ مــعـهـا شــقــا كــل و لـهـان=خمص المثاني لابـسـات الـدراريـع
بنـات بــدو ٍ حــوزهن حوز غزلان=نـهـب الـقـلـوب مـخيبات الطماميع
ومن كان في قلبه للأشــواق مـيـدان=يلقا مجال ٍ يشتري فـيـه ويـبـيـع
ليا عرضت شقر ٍ كما مطرق الـبـان=تلفـح جـدايـلـهـا هـبـوب الـذعاذيع
مادونها حاجز حوامـي و جــدران=هيبات أهلها عن حـمـاهـا مـوانـيـع
والحـب تـأثـيـره على القلب سلطان=جاير ولا راعيه لـلـعـذل بـمـطـيـع
وأول مداخيله على قـلـب الأنـســان=تـجـاذب الـنـظـرات بـيـن المواليع
سراير ٍ يـعـرف لـغـاهـا بـالأعـيـان=تفتح مشاريع ٍ و تـلـغـي مـشـاريـع
بـيـن الـثـنـيـن الـلي لهم بالهوى شان=ماهم بخـالـيـن العـقـول الـقـراقـيـع
وليا لقا بـقـلـوب الأثـنـيـن مـسـكـان=وثقله تـوزع بـيـن الأثـنـين توزيع
سـيـطـر و كـبـرت قيمته عند الأثنان=مادام سره ما عبث بـه و لا ذيــع
وأول غرابيله إلـى مـن الأضـعــان=راحت قسوم وكل ناس ٍ عطت ريع
وتفـاختو مــن عـقـب مـاهم بجيران=ليا شيف لنجم الجنوبــي تـلامـيـع
ونياتـهـم راحـت مـن الـعـد شـتـان=وكل ٍ عـلـى فـالـه يـذب المخاويع
ومن كان مشطون ٍ مع البدو بشطان=أمسى على قـلبـه حداد الـمـراقـيـع
وأصبح يعـدي فـي نـبـا كل مزبان=جسمه معافا و الـضـمـائـر مـواجيع
دور ٍ لـحـقـتـوه أنـت و يــا دبـيّـان=ومن عذبه الصافي خذيتو قـراطـيـع
يـــوم إن لــونــه مــاتـغير ولا شان=ولا خربوه مخربـيـن الـمـواضـيـع
عشق ٍ عـلـى وضح النقا ماله أثمان=مطـامـع ٍ عـلـيـا وعفـه و تـرفـيـع
واليوم يوم النــاس هـانــوه و إنـهـان=وتكـانـفـوه أهـل الـعـتـل والفواريع
ناس ٍ يحسبون الهوى لعب ورعان=دايم على أرقام الـهـواتـف مـدانـيـع
عشق ٍ ظهرله تالي الوقت فـرسـان=مرخين أعنت خيـلـهـم والمصاريع
خـلـوه لـلـي جـايـه الـيـوم نـشطان=وده يقوع لـه مـن الـقـاع تـقـويـع

[/poet]


هذا مأستطعت أن أجمعه لهذا الشاعر
الذى تغنت بقوافيه القوافل والصدور



تحياتى