(بين العقوق وبين تفريق الاولاد)

[poem=font="Simplified Arabic,5,white,bold,normal" bkcolor="transparent" bkimage="backgrounds/37.gif" border="double,4,gray" type=0 line=0 align=center use=ex num="0,black""]
بين العقوق وبين تفريق الأولاد=المجتمع يشكي جروحٍ عطيبه
قضيتينٍ للأسف شرها زاد=الكل منهن بالحقيقه مصيبه
بقيادة الآبا للابناء وتنقاد=تنجا الكتيبه أو هلاك الكتيبه
ياللي جحدت الفضل قافيك جحّاد=حبلٍ لويته لازمٍ تلتويبه
ماتدري أن الله على كل مرصاد=والوالدين لهم حقوقٍ صعيبه
ولاتقل أفٍ لهم يابن الأجواد=وإياك تنظرهم بعينٍ غظيبه
واعلم ترى زرعك على كف حصّاد=وجميع ما ودعت لبنك يجيبه
إن كنت نكدٍ يجيك بأنواع الأنكاد=ويسقيك من ديد القطاعه حليبه
وإن كنت بر أبشر بلذات الاعياد=وحظٍ سعيدٍ في نصيبك وصيبه
والله إن يشوف العطف حتى على الزاد=ومن بر به صيبه تبارك نصيبه
سراير الأجداد بقلوب الأحفاد=تعربوا ياهل الأصول العريبه
والثانيه تفريق فلذات الاكباد=كم أسرتن عقب الأناسه كئيبه
أبليس حيٍ ويقدح النار بزناد=وأخوان يوسف حولوه بقليبه
عبرة ومن لايعتبر صاد ماصاد=لو مس للطرقه حبال النجيبه
الميل يرّث بين الاخوان الاحقاد=وتدفع له الاسره رسوم وضريبه
العدل مطلوب على كل من ساد=مير اعدلوا ياهل العقول اللبيبه
وصلاة ربي عد ماحن رعاد=على رسولٍ كلنا نقتديبه
[/poem]