ليال المخاضير

السلام عليكم ورحمة الله وبركاته

أعتذر عن الغياب الخارج عن الارادة وعسى أن تغفر لنا هذه المتواضعة غيابنا

وحنا هالايام في اول الربيع والله يزّين ايامنا وايامكم وكل مسلم



[poem=font="simplified arabic,5,darkblue,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
قم يا فهد شغّل خوي المناعير=جيبٍ لذودك يا فهد مشترينه

نبي نشوف الذود دق ومعاشير=شعلٍ يابوك ودربها مهتوينه

شعلٍ غلاها فوق كل التصاوير=حبٍ قديمٍ عندنا وارثينه

لو عادلوها بالذهب والدنانير=قلنا يسار يسار يا عاقلينه

نتبع هواها بالرخا والمعاسير=والرزق عند الله وربّك معينه

وإن قدّر الله .. جت ليال المخاضير=عشبٍ جديد وخالطه كل عينه

فيه الشقارا والكحل والنواوير=والقحويان يفوح ريحه وزينه

ساقوا عليه مدلهين الأباكير=كلٍ على الطولات يندا جبينه

زان التحدي عقب فك المقاهير =واللي قعد ذوده يشوف الغبينه

يوم اختلط فالجو عج ومعاصير=جاء للعشاير ندب يا سامعينه

كلٍ بذل جهده ولاله معاذير=الفعل واضح والعرب شاهدينه

اللي خذا النوماس شعلٍ مساطير=اللي فحلها قبلها محتسينه

قادتهم الهدلا وخطو المعاشير=كنها تقول الدرب له قايدينه

طبت فياض العشب قبل المظاهير=ترعى زماليقه بوقته وحينه

والبيت شيّد للنشاما المسايير=في رأس مشرافٍ جذب ناظرينه

ربعة شرف فيه الوجيه المسافير=أهل الوفا وأهل العقول الرزينه

هذا عضيد وذاك زبن المخاسير=والكل منهم موقفه شايفينه

من بينهم صفر الدلال المباهير=فنجال كيف ودارهم من يمينه

حديثهم يجيك بأحلى التعابير=كلٍ يجيب النادره والثمينه

سوالفٍ يطرب لها صغير وكبير =والعود الأزرق بينهم دايرينه

من عقبها ساقوا حليب المصاغير=ولقط الزبيدي بالغظا مشتوينه

وطليّهم يطّبخ بعد علّق عصير=سلمٍ لهم فيما مضى حافظينه

ولا حان وقت الفرض ما فيه تأخير=طاعة ولي العرش رأس السمينه

هاذي طراة الروح قبل المقادير=والعمر واحد ما تكرر سنينه

وقم يا فهد شغّل خوي المناعير=إنص الجنوب ودربها عارفينه[/poem]

وسلامتكم